Zańnamaǵa memlekettik qyzmetshige jumystan tys ýaqytta qosymsha tabys tabýǵa ruqsat beretin norma engizilmek, dep habarlaidy QazAqparat agenttigi.
Bul týraly QR Memlekettik qyzmet isteri agenttiginiń tóraǵasy Anar Jaiylǵanova ortalyq kommýnikatsiialar qyzmetinde ótken brifingide aitty.
«Búgingi kúni zańnamada memleketik qyzmetshige qosymsha jumyspen ainalysýǵa ruqsat beretin norma joq. Biraq biz bolashaqta zańǵa engizýdi oilastyryp jatyrmyz. Iaǵni jumystan bos kezinde qosymsha jumyspen ainalysýǵa bolady dep kirgizemiz. Dál qazir zańnamada bul joq. Biraq biz daiyndap jatyrmyz», - dedi agenttik basshysy BAQ ókiliniń suraǵyna bergen jaýabynda.
Onyń paiymynsha, memlekettik qyzmetshi jumystan tys ýaqytta kásipkerlikke jatpaityn qzymet túrlerin usyný arqyly tabys taba alýǵa tiis.
«Nelikten olarǵa qosymsha jumys isteýge bolmaidy? Bolady. Biraq kásipkerlikpen emes. Mysaly, jumystan bos kezinde taksist bolyp jumys isteýge bolady degen siiaqty. Otbasyn asyraýǵa qosymsha qarajat kerek bolsa, soǵan ruqsat beretindei zańnamalyq ózgerister daiyndap jatyrmyz. Biraq ol áli qabyldanǵan joq. Al kásipkerlikpen ainalysýǵa bolmaidy», - dedi Anar Jaiylǵanova.
Onyń aitýynsha, Prezidenttik jastar kadrlyq rezervinde laýazymdy basshylardyń balalary joq.
«Biz ol jaǵyn mindetti túrde tekseremiz jáne joǵary laýazymdy sheneýnik týysy bar kandidattar nemese laýazymdy tulǵalardyń balalary joq. Biz kerisinshe múmkindigi joq jastarǵa «áleýmettik lift» usynǵymyz keledi. Negizi olar, konkýrsqa qatysyp-aq memlekettik qyzmetke bara alar edi. Biraq Prezidenttik jastar kadrlyq rezervi arqyly ótkisi kelse, nege bolmasqa?», - dedi agenttik basshysy.
