Memlekettik qyzmetshilerge kez kelgen qundy syilyqtardy syiǵa tartýǵa tyiym salynady. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
«Memleket basshysy «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» Zańǵa qol qoidy. Zań sybailas jemqorlyq kórinisterin júieli túrde aldyn alý boiynsha qosymsha sharalar engizýge baǵyttalǵan», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, Azamattyq kodekste memlekettik qyzmetshilerge kez kelgen qundy syilyqtardy syiǵa tartýǵa tyiym salynady. Azamattyq kodekstiń memlekettik qyzmetshilerge qatysty syiǵa tartý máselelerin retteitin erejelerin qoldanystaǵy zańnama normalarymen úilestirý qajettiligi «Qazaqstan Respýblikasyndaǵy konstitýtsiialyq zańdylyqtyń jai-kúii týraly» Konstitýtsiialyq Keńestiń 2018 jylǵy 5 maýsymdaǵy joldaýynda kórsetilgen.
«Ózderińiz biletindei, qazirgi ýaqytta Qylmystyq kodekstiń 367-babyna sáikes memlekettik fýnktsiialardy atqarýǵa ýákiletti tulǵalarǵa, olarǵa teńestirilgen tulǵalarǵa, jaýapty memlekettik laýazymdy atqaratyn tulǵalarǵa nemese laýazymdy tulǵalarǵa buryn jasaǵan zańdy áreketteri nemese áreketsizdigi úshin quny 2 ailyq eseptik kórsetkishten asatyn syilyqtar tartý qylmystyq jaýapkershilikke ákep soǵady. Al, Ákimshilik quqyq buzýshylyq týraly kodekstiń 676, 678-baptaryna sáikes, jeke nemese zańdy tulǵalardyń atalǵan tulǵalarǵa zańsyz syilyqtar berýi ákimshilik sybailas jemqorlyq áreket bolyp sanalady. Osylaisha, qoldanystaǵy zańnamada sybailas jemqorlyq sýbektilerine olardyń laýazymdyq jaǵdaiyna bailanysty kez kelgen qundy syilyqtardy syiǵa tartýǵa tyiym salynady», - dedi Oljas Bektenov.
Sondyqtan onyń atap ótýinshe, Azamattyq kodekstiń 509-babymen kózdelgen normany Qylmystyq jáne Ákimshilik kodeksteriniń normalarymen sáikes keltirýge týra keldi.
«Sybailas jemqorlyqqa qarsy is-qimyl týraly» Zańda sybailas jemqorlyqqa qarsy shekteýler qabyldaityn tulǵalardyń otbasy músheleriniń materialdyq syiaqy, syilyqtar nemese kórsetiletin qyzmetterdi qabyldaýyna tyiym salynady», - dedi tóraǵanyń birinshi orynbasary.
