Memlekettik organnyń basshysy nemese qyzmetkeri esepshotyna kelip túsken syilyq aqshany memleketke qaitarýy tiis. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
Májilistiń jalpy otyrysynda «QR-nyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn talqylaý barysynda depýtat Meiram Pishembaev qaralyp otyrǵan qujattyń 12-babyna qyzmetkerlerge nemese olardyń otbasy múshelerine habardar etilmei kelip túsken syilyqty kúntizbelik 7 kún ishinde memlekettik múlikterdi basqarý jónindegi ýákiletti organǵa óteýsiz berý kózdelgen norma enizilgenine nazar aýdardy.
«Osyǵan orai meniń mynadai suraǵym bar. Árine, ómir bolǵan soń ártúrli jaǵdai bolady. Keibir kezde oilamaǵan, kútpegen oqiǵalar kez kelýi múmkin. Máselen, memlekettik organnyń basshysy nemese qyzmetkeri ne olardyń otbasy músheleri shotyna túsken syilyq týraly habardar bolmasa, ne isteýi kerek?», - dep surady depýtat Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenovten.
Agenttik tóraǵasynyń birinshi orynbasary bul norma qoldanystaǵy zańnamada bar ekenin, jańadan engizilgen talap emestigin atap ótti.
«Eshqandai jańadan tyiym salynbaidy. Rasynda da, memlekettik qyzmetshi ne onyń otbasy músheleriniń esepshotyna aqsha aýdarymy tússe, onda olar ony bilmeýi de múmkin. Mundai jaǵdaida 7 kúnniń ishinde bul aqsha memlekettik biýdjetke aýdarylýy tiis. Al syilyqqa keletin bolsaq, bizdiń pikirimizshe, syilyqty alý men ony anyqtaý bir mezette oryn alatyn jaǵdai dep aitýǵa bolady. Sondyqtan osyndai norma qoldanystaǵy zańda bar», - dedi ol.
