"Beibitshilik salasyndaǵy Nobel syilyǵy shielenis pen soǵysqa ákelgen saiasatkerlerge berilip, syilyqtyń bedeli ketti. Ony qalpyna keltirý úshin syilyqty qaitaryp alý protsedýrasyn engizý kerek" dedi Resei Memlekettik dýmasynyń tóraǵasy Viacheslav Volodin Telegram-kanalynda.
"Irgeli ǵylym salalaryndaǵy Nobel syilyǵyna suraq joq. Ol shynaiy jetistikterge beriledi. Biraq beibitshilik salasyndaǵy syilyqqa kelgende mundai naqtylyq joq, baǵalaý kriteriileri joq. Alfred Nobel ósietinde qor qarajaty halyqtardy biriktirýge, turaqty áskerdi taratýǵa ne qysqartýǵa nemese beibitshilik bastamalaryn damytýǵa úles qosqan adamǵa berilsin" deidi Volodin.
Volodin Beibitshilik salasyndaǵy Nobel syilyǵynyń SSSR prezidenti Mihail Gorbachevke, Mianma saiasatkeri Aýn San Sý Chjige, AQSh-tyń burynǵy prezidenti Barak Obamaǵa berilgenin eske saldy. Dýma basshysy Gorbachevtyń "biligi halyqtardyń bytyraýyna, 20-ǵasyrdaǵy eń iri geosaiasi apat – SSSR-diń ydyraýyna ákeldi deidi. Ol sondai-aq Aýn San Sý Chjidiń Nobel syilyǵyn alǵannan keiin rohinja musylmandaryna genotsid jasady dep aiyptalǵanyn atap ótti. Onymen shektelmei Obamany "arab kóktemi" men Siriiadaǵy shieleniske jaýapty etti.
"Mundai sheshimderdiń Beibitshilik salasyndaǵy Nobel syilyǵynyń bedelin túsirgeni anyq. Oǵan degen senimdi qylmys, adam quqyǵy men erkindikterin buzý faktileri anyqtalǵan jaǵdailar úshin syilyqty qaitaryp alý protsedýrasy ǵana qaitara aladady" dep jazdy Volodin.
Memlekettik dýma basshysynyń bul sózi Beibitshilik salasyndaǵy Nobel syilyǵy reseilik jýrnalist Dmitrii Mýratovqa berilgen tusta aitylyp otyr. Halyqaralyq jýrnalister, quqyq qorǵaýshylar Nobel syilyǵynyń "Novaia gazeta" saitynyń bas redaktoryna berilýi Reseidegi táýelsiz jýrnalistikaǵa qoldaý dep baǵalaǵan.
Keiingi jyldary Kreml sóz erkindigin shektep, táýelsiz baspasózdi qýdalaýmen kózge túsip otyr. Osy jyly bilikke táýelsiz basylymdardyń kóbin "shetel agenti" dep tanyp, olardy ár habarynyń aldynda osy týraly eskertip otyrýǵa mindettedi.
Kremlge jaqyn adamdar Mýratovtyń syilyq alýyn ne elemei, ne jaǵymsyz sipatta kórsetýge tyrysty. Al Resei prezidenti Vladimir Pýtin Mýratovqa qarata "Nobel syilyǵyn qalqan qylyp jasyrynbai-aq qoisyn" dedi.
