Memlekettik baǵdarlamalardy júzege asyrý aiasynda taýarlardy jetkizý jumystary men qyzmetterdi atqarýda otandyq kásiporyndarǵa basymdyq beriledi.
Bul týraly búgin Úkimet otyrysynda QR Indýstriia jáne infraqurylymdyq damý birinshi vitse-ministri Qaiyrbek Óskenbaev aitty, dep habarlaidy "Ult aqparat".
«Qazirgi ýaqytta syrtqy ekonomikalyq jaǵdaidyń ózgerýin eskere otyryp, ónerkásiptegi ahýaldy turaqtandyrý maqsatynda Úkimet jedel sharalardy qolǵa aldy. Bul sharalar jumys oryndaryn saqtap qalýdy, ishki naryqqa baǵyttalǵan jańa óndiristerdi damytýdy, sonymen qatar qazirgi saýda aǵymdaryn saqtaý úshin balamaly ótkizý naryqtaryn izdeýdi kózdeidi. «Nurly jol» jáne «Nurly jer» memlekettik baǵdarlamalaryn júzege asyrý aiasynda taýarlardy jetkizý jumystary men qyzmetterdi atqarýda otandyq kásiporyndarǵa basymdyq beriledi», - dedi Qaiyrbek Óskenbaev.
Onyń atap ótýinshe, bul shara qurylys materialdary, metallýrgiia, himiia jáne basqa aralas sektorlardaǵy kásiporyndardyń júktemesin qamtamasyz etýge múmkindik beredi.
«Naqtyraq aitsaq, 2020 jyly memlekettik baǵdarlama aiasynda 15 million sharshy metr turǵyn úidi paidalanýǵa berý, 2,6 myń shaqyrym respýblikalyq, 4,3 myń shaqyrym jergilikti mańyzy bar joldardy salý jáne jóndeý kózdelgen. Osy is-sharalardy iske asyrý esebinen otandyq jetkizilimderdiń úlesin 95 paiyzǵa deiin ulǵaitý josparlanǵan», - dedi birinshi vitse-ministr.
