Elimizde ekologiiany qorǵaityn saiasi uiym quratyn ýaqyt jetti. Bul týraly «Tabiǵat» ekologiialyq odaǵynyń tóraǵasy Mels Eleýsizov BAQ ókilderimen kezdesý kezinde aitty, dep habarlaidy Baq.kz agenttigi.
Onyń aitýynsha, qazir elimizdiń ekologiialyq jaǵdai múshkil halde jáne aýa sapasy jyldan-jylǵa nasharlap barady.
«Men 1990 jyldardan beri «Jasyl Qazaqstan» saiasi partiiasyn qurý máselesin kóterip júrmin. Ol kezde halyq belsendi emes edi, sondyqtan bul bastama qoldaýǵa ie bolmady. Qazir halyq bárine toidy. Saiasi monopoliia óz degenin jasaýda. Ony buzý kerek, sanaýly adamnyń ǵana pikiri aitylmaý kerek, iaǵni pikir-talas oryn alý kerek. Qazir Zańdar partiialardyń atsalysýymen qabyldanýda. Eger ol jerde jan-jaqty pikir-talas bolsa, durys Zań qabyldanar edi», - dedi ol.
Sonymen qatar ol, halyqtyń saiasi belsendiligi óte tómen ekendigin aita kele jańadan qurylatyn partiia óz músheleri men jurtshylyqty sailaýǵa shaqyrýǵa yqpal etetinin jetkizdi.
«Óitkeni elimizde halyqtyń 20% ǵana sailaýǵa qatysady eken. Halyq belsendi emes, bul bilikke tiimdi bolyp otyr. Saiyp kelgende elimizdiń osyndai nashar halge túsýine jurtshylyqtyń ózi kináli. Eger olar qoǵamdyq jumystarǵa, sailaýǵa belsendi qatyssa, mundai nashar halge túspes edik. Alǵash Sovet úkimeti qulaǵan tusta sheneýnikter aiaǵyn ańdap basatyn, keiin olar halyq eshteńege bas aýyrtpaitynyn, talap etpeitinin túsingen soń oilaryna kelgenin jasai bastady», - dedi ol.
Sondai-aq ol partiiany ustap turý úshin syrttan eshqandai qarajat bólinbeitindigin tek halyq esebinen bolatynyn jetkizdi.
«Bul elimizdi revoliýtsiialyq tóńkeris jasaityn partiia bolǵanyn qalamaimyn. Parlamentte zańdy túrde óz talaptaryn qoia biletin halyqtyq partiia bolý kerek. Partiia ustap turý úshin onyń músheleri ortaq jarnaǵa belgili mólsherde qarajat salady. Sondai-aq bul partiia jastardyń múddesin qorǵaý kerek, óitkeni bolashaq - solardiki», - dedi M. Eleýsizov.
