Elimizde mektepterdiń tek 6 paiyzy ǵana kúzet uiymdarymen kelisimshart jasasqan. Bul týraly halyqqa esep berý kezdesýinde QR Ishki ister ministri Erlan Turǵymbaev aitty, dep habarlaidy "Ult aqparat".
«Memleket basshysynyń tapsyrmasyna sáikes, Ishki ister ministrligi bilim berý uiymdarymen birge mektepterdi tekserip jatyr. Qazirdiń ózinde birqatar kemshilik anyqtaldy. Atap aitqanda, mektepter 100 paiyz beinebaqylaý júiesimen qamtylǵanymen, olardyń jartysyna jýyǵy bekitilgen standartqa sai kelmeidi», - dedi ministr.
Onyń atap ótýinshe, elimizdegi árbir úshinshi mektep jedel habarlandyrý júiesimen, 8 paiyzy dabyl túimeshegimen, 5 paiyzy baqylaý jáne ótkizý júiesimen, 4 paiyzy týrniketpen, 1 paiyzy metall izdeý qurylǵysymen jabdyqtalǵan.
«Mektepterdiń tek 6 paiyzy ǵana kúzet uiymdarymen kelisimshart jasasqan», - dedi Erlan Turǵymbaev,
Sonymen qatar ol Bilim jáne ǵylym ministrligimen birge bilim berý uiymdaryna alyp kelýge tyiym salynatyn zattardyń tizbesi ázirlengenin aitty. Bul tyiym osy jyldyń 13 maýsymynan kúshine enetin bolady.
