Mektepterdi jańǵyrtý, qaita qurý, jóndeý jáne salý úshin jeke memlekettik baǵdarlama qajet. Bul týraly Batys Qazaqstan oblysynda jumys saparymen júrgen Májilis depýtaty Snejanna Imasheva málim etti, dep habarlaidy QazAqparat.
Depýtat facebook-tegi óziniń paraqshasynda jazǵanyndai, Báiterek aýdanynyń Novenkii, Dostyq, Makarov aýyldaryn aralaǵan kezde keleńsiz kórinistiń kýási bolǵan.
«Saraiǵa kóbirek uqsaityn bilim ordalarynda boldym. Jartylai apatty, qiraǵan eski ǵimarattardyń tóbesinen sý aqqan, qabyrǵalary jarylǵan, buryshtary kógergen, edenderi jalba-julba. Osyndai mektepter kún saiyn balalardy qabyldaidy. Balalar mundai qarańǵy jerge kirgisi kelmeitin shyǵar, biraq bilim úshin, amaly joq, barady. Bir mektepke myńǵa jýyq, ekinshisine alty júzdei, úshinshisine elý oqýshy kelip júr. «Turmys sanany bileidi» dep jatady. Eger osy qaǵidany ustansaq, balalardyń bilimi qiraǵan sarai sekildi tómen bolýy kerek edi. Alaida soǵan qaramastan, bul mektepterde oqý ozattary kóp, túrli olimpiada júldegerleri, jobalar jeńimpazdary barshylyq. Muǵalimderge taǵzym!» dep jazdy Snejanna Imasheva.
Ol sondai-aq QR Bilim jáne ǵylym ministri Ashat Aimaǵambetovke qarata: «Bizge mektepterdi jańǵyrtý, qaita qurý, jóndeý jáne salý úshin jeke memlekettik baǵdarlama qajet. Mundai mektepter elimizde az emes. Tek ákimderge úmit artýǵa, olar qashan qarjy tabady dep kútip otyrýǵa bolmaidy», dedi ol.
