Otandyq óndirýshiler el óńirlerine qajetti mólsherde mektep avtobýstarymen qamtamasyz etýge daiyn. Bul týraly QR Indýstriia jáne infraqurylymdyq damý ministri Beibit Atamqulov Úkimet otyrysynda aitty, dep habarlaidy "Ult aqparat".
«Indýstriia jáne infraqurylymdyq damý ministrligi Bilim ministrligimen birlesip, mektepterdegi balalardy tasymaldaýǵa arnalǵan avtobýstarmen qamtamasyz etý jónindegi tiisti Jol kartasyn bekitti. Búgingi kúni 515 mektep avtobýsy qajet, onyń ishinde 20 oryndyq 347 avtobýs jáne 40 oryndyq 168 avtobýs kerek», - dedi Atamqulov jiynda.
Ministrdiń aitýynsha, balalardy, onyń ishinde tirek-qimyl fýnktsiialary buzylǵan balalardy tasymaldaýda jabdyqtalǵan kólik quraldaryna qoiylatyn tehnikalyq talaptar aiqyndaldy.
«Olar – balalarǵa arnalǵan 4 núkteli qaýipsizdik beldigi bar oryndyqtar, balalardy salonda qaldyryp ketpeý úshin aldyn alý júiesi, apattyq jaǵdaida salonnyń artqy esiginen bir ret basý arqyly shyǵýy, sanitarlyq-epidemiologiialyq qondyrǵylar jáne júieler men agregattar toraptarynyń qaýipsizdigin intellektýaldy avtomatty tekserý jáne taǵy basqa tehnikalyq talaptar aiqyndaldy», - deidi Atamqulov.
Sondai-aq, mektepterdi avtobýstarmen qamtamasyz etý úshin tek otandyq kásiporyndar tartylady, olar – «QazTechna» JShS Yutong markaly 20 oryndyq 287 avtobýs, «DaewooBusKazakhstan» JShS PAZ markaly 20 oryndyq 60 avtobýs jáne «HyundaiTransAuto» JShS Golden Dragon 40 oryndyq 168 avtobýs.
Ónerkásipti damytý qory arqyly avtobýstardy lizingke satyp alý úshin tiisti qarajat biyl 22 mlrd teńge kóleminde kózdelgen.
«Budan basqa, jergilikti atqarýshy organdar biýdjetine júktemeni tómendetý úshin avtobýstardy lizingtik qarjylandyrý sharttaryna avanstyq tólemdi 15% paiyzdan 0% paiyzǵa deiin tómendetý bóliginde ózgerister engizildi. Osylaisha, mektepterdi avtobýstarmen jabdyqtaý rásimderin aiaqtaý úshin eń aldymen Qarjy ministrligi respýblikalyq biýdjetti qalyptastyrý kezinde jergilikti atqarýshy organdardyń oblystyq biýdjetterinde 2022 jyldan bastap lizingtik tólemderdi óteý úshin nysanaly transfertter kózdesin.
Ekinshi, jergilikti atqarýshy organdar biylǵy tamyz aiynda mektep avtobýstaryn satyp alýǵa konkýrstar jariialaýy qajet. Óz kezeginde, otandyq óndirýshiler el óńirlerine qajetti mólsherde mektep avtobýstaryn ýaqytyly jetkizýdi qamtamasyz etýge daiyn», - dedi ministr.
