Elimizdiń bilim berý uiymdaryndaǵy qaýipsizdik júiesine qatysty kemshilikter jyl sońyna deiin joiylady. Bul týraly búgin QR Parlamenti palatalarynyń birlesken otyrysynda Ishki ister ministri Erlan Turǵymbaev aitty, dep habarlaidy "Ult aqparat".
«Balalardyń qaýipsizdigi - óte ózekti másele. IIM birqatar is-shara qabyldady. Birinshiden, zańǵa ózgertý engizildi. Balalarǵa qatysty zorlaý, seksýaldy qylmystar úshin jaýapkershilik pen jaza kúsheitildi. Jaza merzimi uzartyldy, endi bul bap boiynsha tatýlasý múmkin emes jáne merziminen buryn bosatylmaidy. Ekinshisi – aldyn alý máseleleri. Qazir kámeletke tolmaǵandardyń isi boiynsha inspektorlardyń sany 448-ge deiin arttyryldy. Endi ár qalada, ár aýmaqta, ár aýdanda osyndai inspektor bolady. Olar jergilikti atqarýshy organdarmen birge aldyn alý is-sharalardy júzege asyrady», - dedi ministr otyrys barysynda depýtattardyń saýalyna orai.
Onyń atap ótýinshe, Tatarstannyń Qazan qalasynda oryn alǵan oqiǵaǵa bailanysty Memleket basshysynyń tapsyrmasy bar.
«Mektepterdegi qaýipsizdik is-sharalary boiynsha memlekettik organdarmen birge jumys istep jatyrmyz. Eń aldymen bilim berý organdarymen birge 7 500 mektepti tekserdik, 100 paiyzynda beinebaqylaý kamerasy bar. Biraq, 45 paiyzy ǵana tehnikalyq standartqa sai keledi. Basqa da kemshilikter bar. Mektepterdiń 30 paiyzynda dabyl júiesi joq, týrniketter men temir izdeitin qurylǵylar 5 paiyzynda ǵana bar, 6 paiyzynda ǵana kúzet uiymdary jumys isteidi. Búgingi tańda Ishki ister ministrligi Bilim jáne ǵylym ministrligimen, jergilikti atqarýshy organdarmen birge jumys istep jatyr. Qarjy bólinedi. Jyl sońyna deiin osy kemshilikterdi joiamyz dep oilaimyn», - dedi Erlan Turǵymbaev.
