Qazaqstanda orta bilim berý mekemelerinde ózin-ózi basqarý júiesin engizý josparlanýda. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Ulttyq keńes otyrystarynda qaralyp usynylǵan ideialar men bastamalardyń 43 paiyzy bilim berý salasyna qatysty. Bul degenimiz bilim qashanda basty nazarda degen sóz. Bilim salasyndaǵy búgingi ózgeristerge kelsem, aldymen basqarý. Aitar bolsam, búginde joǵary oqý oryndaryna korporativtik basqarý júiesin engizdik. Buryn ýniversitet rektorlary barlyq mańyzdy sheshimderdi óz betterimen qabyldasa, endi direktorlar keńesi bar. Orta bilim berýge kelsek, endigi ýaqytta muǵalimder jumysqa baiqaý arqyly qabyldanady. Sonymen qatar biz qarjylandyrý salasynda da aitarlyqtai reforma júrgizip jatyrmyz. Endigi ýaqytta bilim berý uiymdaryna qarjy jan basyna eseptelip bólinedi. Bul naqtylyq. Demek JOO-da 1 myń stýdent bar ma sonsha janǵa eseptelinip qarajat bólinedi», - dedi Aimaǵambetov elordada ótken Prezidenttik jastar kadrlyq rezervteriniń forýmynda.
Odan bólek, ministr bilim berý salasyndaǵy taǵy bir jańashyldyq mektepke deiingi tárbie jáne bilim berý uiymdaryn ata-ananyń ózi tańdai alatynyn aityp ótti.
«Sońǵy 2 jylda elimizde jeke mektepterdiń sany 2 esege artty. Bul óz kezeginde memlekettik biýdjetke túsetin salmaqty azaitady. Qazirgi ýaqytta JOO-ǵa ózin-ózin basqarý júiesi engizildi, bul tájiribe kolledjderge de engizilip jatyr. Aldaǵy ýaqytta ózin-ózi basqarý júiesin mektepterge engizetin bolamyz. Sebebi pandemiia bilim berý mekemeleri basshylarynyń óz betinshe sheshim qabyldap, tiimdi jumys isteýdiń mańyzdylyǵyn kórsetti. Tsifrlandyrýǵa kelsek, búginde mekteptegi pándik olimpiadalar men UBT elektrondyq formatta ótip jatyr. Bul ýaqyt pen qarjyny áldeqaida únemdeidi», - deidi ol.
