Foto: kstnews.kz
Qazaqstandaǵy barlyq mektepte litsenziiasy bar kúzet bolýy kerek. Úkimet osyndai talap qoiyp otyr. Bul týraly Premer-ministrdiń orynbasary Altai Kólginov málimdedi, dep habarlaidy Sputnik Qazaqstan.
Vitse-premerdiń aitýynsha, Petropavldaǵy 4-orta mektepte beinebaqylaý kameralary ornatylǵanymen, litsenziialanǵan kúzeti bolmaǵan.
"Bizdiń málimet boiynsha shalǵai aýdandarda litsenziialanǵan kúzet áli joq. Mektepterdiń 87 paiyzynda dabyl batyrmasy, 70%-dan astamynda týrniket, sonymen qatar litsenziialanǵan kúzeti bar. Dese de litsenziialanǵan kúzeti joq mektepter de barshylyq. Ol jerde mekteptiń kúzetshisi ǵana otyrady. Biraq biz litsenziialanǵan kúzetpen kelisimshartqa otyrýdy talap etemiz. Bul úshin mektepter jaýapkershilik alýǵa tiis", - dedi Kólginov Úkimet kýlýarynda.
Sonymen qatar ákimdikterge mektepterdi beinebaqylaýmen qamtamasyz etý mindeti qoiylyp otyr. Ásirese interneti bar qalalar men aýdan ortalyqtarynda osy kameralar Jedel basqarý ortalyǵyna qosylýǵa tiis. Sondai-aq mektepterdegi týrniketter boiynsha da talap qoiyldy.
"Biraq biz kórip otyrǵandai, keibir óńirler bul talapty oryndamaǵan. Sol sebepti qazir barlyq óńirge mektepterde reviziia júrgizip, standartqa sáikestendirý tapsyryldy", - dedi vitse-premer.
Kólginov tótenshe jaǵdai bolǵan Petropavldaǵy mektepte arnaiy komissiia jumys istep jatqanyn atap ótti. Olar qyzmettik tekseris júrgizip jatyr. Al politsiia tergeýmen ainalysýda.
Eske salaiyq, 13 aqpan kúni tańerteń Petropavldaǵy 4-orta mekteptiń oqýshysy qurdastaryn baltamen jaraqattady. Shabýyl jasaǵan jasóspirimdi joǵary synyp oqýshylary men muǵalimder ustaǵan.
Qazir zardap shekken eki bala aýrýhanada jatyr, jaǵdaiy birqalypty. Bir oqýshy meditsinalyq kómek kórsetilgennen keiin úiine qaitaryldy.
Bul fakti boiynsha "Adam óltirýge oqtalý" baby boiynsha qylmystyq is qozǵaldy. Kúdikti oqýshy ýaqytsha ustaý izoliatoryna qamaldy.
