Elimizde orta mektepterde «qazaq kúresi», «toǵyzqumalaq», «asyq atý» boiynsha mindetti sabaq ótkizý ádistemesi ázirlep jatyr. Bul jaiynda Májilis depýtattarynyń saýalyna orai QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Búginde sport sektsiialarmen shamamen 1,4 mln bala nemese mektep jasyndaǵy balalardyń jalpy sanynyń (3,5 mln) 40 paiyzy, onyń ishinde 422 myńnan bastam bala mektepten tys uiymdarda qamtylǵan. Buqaralyq sportty damytý aiasynda sport infraqurylymyn, onyń ishinde aýyldy jerlerde damytýǵa basa nazar aýdarylyp otyr. Máselen, 2023 jylǵa deiin shamamen 159 aýyl mektebin sport zalmen qamtamasyz etý josparlanǵan», - dedi Asqar Mamin.
Úkimet basshysynyń atap ótýinshe, Bilim jáne ǵylym ministrligi dene shynyqtyrý muǵalimderiniń biliktiligin arttyrý jumysyn jolǵa qoiǵan. Ótken jyly 447 dene shynyqtyrý muǵalimi biliktilik arttyrý kýrsynan ótti. Al biyl 2 myńnan astam pedagogty qaita daiarlaý kózdelip otyr. Sonymen qatar 2021 jyldyń qańtarynan sabaqtan tys sport úiirmelerin ótkizgeni úshin dene shynyqtyrý muǵalimderine bazalyq laýazymdyq jalaqynyń 100 paiyzy mólsherinde ústemeaqy tóleý engizildi. Ústemeaqy dene shynyqtyrý muǵalimderin bilim berý uiymdarynda sektsiialar ashýǵa yntalandyratyn bolady.
«Balalardyń densaýlyǵy men tálim-tárbiesine ulttyq sport túrlerinen sabaq ótkizý de oń áserin tigizbek. Qazirgi ýaqytta Mádeniet jáne sport ministrligi men Bilim jáne ǵylym ministrligi «qazaq kúresi», «toǵyzqumalaq», «asyq atýdy» aldaǵy ýaqytta dene shynyqtyrý boiynsha mektep baǵdarlamasyna qosý jáne mindetti sabaq retinde ótizý úshin ádisteme ázirlep jatyr», - dedi Premer-Ministr.
