QR BǴM Balalardyń quqyqtaryn qorǵaý komiteti Balalar jyly aiasynda «Bala Qorgau» internet-resýrsyn iske qosty. Endi mektepterde QR-kody jáne «Bala Qorgau» saitynyń mekenjaiy jazylǵan arnaiy taqtaishalar ornatylyp jatyr, dep habarlaidy "Ult aqparat".
QR-kodty skanerleý arqyly oqýshylar «Bala Qorgau» saityna ótip, óz suraqtaryn qoia alady. Oqýshylar men ata-analar da jasyryn túrde kómek surap, bilim berý uiymdaryndaǵy zańsyz áreketter týraly habarlai alady. Ótinish berýshilerdiń anonim bolyp qalatynyna kepildik beriledi.
Búgingi kúnge deiin Nur-Sultan men Almatynyń birneshe mektebinde QR-taqtaishalar ornatyldy. Aldaǵy ýaqytta olar basqa da bilim berý uiymdarynda ornatylady. Qazirdiń ózinde 100-den astam ótinish tústi, olar negizinen balalar men ata-analar arasyndaǵy qarym-qatynas máselelerine qatysty.
«Bala Qorgau» saity oqýshylar árdaiym qajetti qoldaý men kómek surap, ózderin qaýipsiz sezinýleri úshin jasalǵan. Ártúrli jaǵdailarǵa tap bolǵan balalar kóbinese ózin qalai ustaý jáne kimnen kómek suraý keregin bilmeidi. Olar ózderine nemese qurdastaryna qatysty býlling faktilerin kimge habarlaý keregin bilmeidi. Endi oqýshylar QR-kodty skanerlep, bizben bailanysa alady, sóitip olarǵa qajetti konsýltatsiia, psihologiialyq kómek kórsetiledi. Veb-sait oqýshylardy tolǵandyratyn ózekti máselelerdi, sondai-aq balalar quqyqtaryn buzý faktilerin tez arada anyqtaýǵa kómektesedi. Bul resýrs oqýshylardyń jáne olardyń ata-analarynyń quqyqtyq saýattylyǵyn arttyrýǵa septigin tigizedi», - dedi QR BǴM Balalardyń quqyqtaryn qorǵaý komiteti tóraǵasynyń orynbasary Elina Paýli.
Saitta oqýshylar men ata-analar belgili bir jaǵdaiǵa tap bolǵanda ózin qalai ustaý keregi týraly keńester taba alady. Mysaly, jańa dostar tabýǵa, jaman ortaǵa tap bolmaýǵa jáne t.b. týraly aqparat bar. Balalar suraqty ashyq ta, jasyryn da qoia alady. Ol úshin veb-saitta ótinish qaldyrý kerek, keiin keńesshiler keri bailanys jasap, balalar men ata-analardy mazalaityn suraqtarǵa jaýap beredi.
