Bilim jáne ǵylym ministri Ashat Aimaǵambetov mektepterde uiymdastyrylatyn aqyly olimpiadalarǵa qatysty pikir bildirdi, dep habarlaidy Tengrinews.kz.
Aldymen ministr elimizde mundai másele baryn ashyq aitty.
"Qazir olimpiada kóbeiip ketti dep aitýǵa bolmaityn shyǵar. Olardyń sany birshama azaidy. Biraq olimpiada áli bar. Keibir olimpiada aqyly bolǵannan keiin onyń mazmuny da joǵalyp ketti. Olar tapsyrmany beredi. Keiin ony bala alyp, úiine barady. Týǵan-týystarymen birge tapsyrmany oryndap, jaýabyn beredi. Ol jaýap boiynsha 1 emes, 30 adam birinshi oryn, 30 adam ekinshi oryndy alady. Sonda mundai olimpiadanyń qandai máni bar?", - deidi Ashat Aimaǵambetov halyq aldynda esep berý kezdesýinde.
Onyń pikirinshe, osyndai árekettiń saldarynan pándik Olimpiadanyń bedeli tómen túsip ketken.
"Búginde "óte jaqsy olimpiada" degen uǵymnyń ózi aqyly olimpiadanyń kesirinen bedeli tómen tústi. Sondyqtan biz muny ózgertý boiynsha sharany qoldadyq. Biz mektepterde aqyly olimpiada ótkizbeý kerek degen talap qoidyq. Eger oqýshy úide bolǵanda, sabaqtan bos ýaqytta aqyly olimpiadaǵa qatysamyn dese oǵan eshkim shekteý qoia almaidy. Óitkeni, bul - adamnyń jeke tańdaýy", - dedi ministr.
Ashat Aimaǵambetov bilim ordalarynda aqyly olimpiada uiymdastyrylmaýy keregin atap ótti.
"Biraq mektep uiymdastyryp, olar aqyly olimpiadaǵa qatys dep májbúrlese, bul basqa másele bolyp sanalady. Qazir biz aqysyz olimpiadalardyń sanyn kóbeitip jatyrmyz. Ondai Olimpiadalar kóp bolýy kerek. Bul - balalar úshin mańyzdy. Birinshiden, ol ashyq, adal bolýy kerek. Ekinshiden, balanyń bilimin anyqtaityn olimpiada bolýy kerek", - deidi ol.
Ministr bul másele baqylaýynda ekenin jetkizdi.
"10 birinshi oryn, 45 ekinshi oryn degen máseleni bilimniń ábden qunsyzdanǵanyna teńeýge bolady. Sondyqtan biz bul másele boiynsha tiisti sheshimdi qabyldap, ony birneshe ret aittyq. Sondyqtan bul másele sheshilip jatyr. Biraz ózgerister bar. Aldaǵy ýaqytta bul máseleni sheshemiz degen oidamyn", - dep túiindedi sózin Ashat Aimaǵambetov.
