Foto: Baq.kz
Májilis depýtaty Erkin Ábil feisbýk paraqshasynda qazaqstandyqtarǵa saǵat tili nege keri jyljytylǵanyn jáne bul sheshimge narazylyq bildirýdiń esh máni joq ekenin «sońǵy ret» túsindirdi.
Májilismenniń aitýynsha, saǵat beldeýin anyqtaý ońai — Grinvich meridiany boiymen árbir 15 gradýs saiyn shartty shekara soltústikten ońtústikke qarai júrgizilgen.
«15 gradýs eni bar jolaq (7,5 gradýs batysqa jáne 7,5 gradýs shyǵysqa qarai) geografiialyq saǵat beldeýi bolyp tabylady. UTC+5 — bul 75 gradýs shyǵys boilyǵynyń ekvivalenti, pliýs-minýs 7,5 gradýs (shyǵys boilyǵy 67-den 82 gradýsqa deiin)», — dep qosty ol.
Ol sondai-aq UTC+5 saǵat beldeýine enetin qalalardy atady. Olar — Almaty (shyǵys boilyǵy 76 gradýs), Astana (71 gradýs), Shymkent (70 gradýs). Óskemen (82 gradýs) onyń shekarasynda ornalasqan, sondai-aq Semei (80), Petropavl (69) jáne Jezqazǵan (68) da sol beldeýge kiredi.
Depýtat qazaqstandyqtarǵa UTC+7 saǵat beldeýine kóshý (petitsiiada «eki saǵat qosý») usynysyna jaýap berdi. Ol bul Tailandtyń ýaqyty ekenin jáne onyń Qazaqstannan áldeqaida shyǵysta ornalasqanyn aitty.
«Qarańǵy erte túsedige kelsek — búginniń ózinde Astanada kúndizgi ýaqyt uzaqtyǵy — toǵyz saǵat (jeltoqsanda odan da qysqarady). Al biz táýliktiń 16 saǵatyn uiqysyz ótkizemiz (24 saǵattan segiz saǵat uiqyny shegergende). Siz saǵat tilin qalai aýystyrsańyz da, jeti saǵat boiy qarańǵyda júresiz. "Keshki ýaqytta jaryqta júreiik" degender tańnyń eki saǵatqa keshirek atatynyn eskermeidi. Búgin kún 7:20-da shyǵady, al UTC+7 boiynsha tań 9:20-da atyp, jeltoqsanda tek 10:00-de shyǵatyn bolady. Jaryqty keshke emes, tańda jaǵaiyq degen usynys — tamasha logika!» — dep birińǵai saǵat beldeýin engizý bastamashysy túsinikteme berdi.
Erkin Ábil sońynda bul taqyrypta pikir talastyrmaitynyn jáne «aiqyn nárselerdi sońǵy ret túsindirgenin» qosty.
«Ózgelerdi nadan dep kinálamas buryn, mekteptegi "Tabiǵattaný" kýrsyn qaitalap, saǵat beldeýlerimen ózderińiz tanysyńyzdar», — dep qorytyndylady ol.
