Kópbalaly ana Alima Dúisenbieva 6 jastaǵy naýqas balasy úshin kópshilikten kómek suraidy, dep habarlaidy Almaty.tv.
Saiat esimdi baldyrǵanǵa aq qan diagnozy qoiylǵan. Dárigerler onyń jilik maiyn aýystyrý qajet ekendigin aitady. Endi Saiattyń ómirin saqtap qalý úshin ata-anasy shet elge attanýǵa májbúr.
"5 jasqa deiin Saiat zerek ósti. Atqarǵan jumysy tiianaqty, kez kelgen dúniege qyzyǵýshylyq tanytyp, kórsem, bilsem" dep turatyn deidi anasy. Alaida, býyny bekip, buǵanasy qatpaǵan baldyrǵandy taǵdyr tezine saldy dersiz. 8 ai buryn dárigerler leikemiia diagnozyn qoiǵan.
«Qyrkúiek aiynan bastap, balamnyń qulaǵy aýyrlap, muryny bitelip, moinynan bezder baiqadym. Sodan keiin naqty diagnozy anyqtaldy. Qansha ai boldy, qarqyndy túrde emdelip jatyrmyz. Biraq beti beri qaitqanymen, jilik maiyn aýystyrmai jasalǵan em durys bolmaidy», – dedi anasy Alima Dúisenbieva.
Balanyń emi úshin qazir qomaqty qarajat kerek. Otbasy bul salada túrik aǵaiyndarymyzdyń tájiribesi men em-sharasyn joǵary sanap, Stambulǵa jol júrmek niette. Al túrkiialyq meditsina qyzmetkerleri jaqynda balaǵa donor tabylǵanyn aityp qýantqan. Tek qarjy jaǵy qolbailaý bolyp tur. Otaǵa 50 mln teńge qajet.
«Barlyq qazaqstandyqtardan, aǵa-ápkelerimizden, bar jaqsylardan kómek suraimyz. Bala jazylyp ketse eken deimin. Qoldaýyńyzǵa, kómegińizge mutajbyz», – dedi anasy.
Qazir Saiatqa erekshe kútim kerek. Buǵan deiin birneshe ret himiia men sáýleli terapiia alypty. Ol bala aǵzasyna asa aýyr tigen kórinedi. Endi jalǵyz úmit kúrdeli otada deidi anasy.
«Armanym tezirek mektepke baryp, bilim alsam deimin. Baýyrlarymnyń ortasynda bolǵym keledi», – dedi Saiat Esenbek.
Ata-anasy balasy syrtqatqa shaldyqqan kúnnen bastap, túrli qorlar men qaiyrymdylyq toptarǵa jaǵdaiyn aityp júgingen. Jomart jandardyń kómegimen búginge deiin 7 mln teńge jinalypty. Dese de balanyń emi úshin bul qarjy jetkiliksiz bolyp tur. Búldirshinniń saýyǵyp ketýine jaǵdai jasap, úles qosatyn jany jaisań jandar bolsa, ekranda kórsetilgen telefon nómirlerge habarlassa bolady.
Ulaǵat Arǵyn, Saǵyntai Muńaitpasov, «Almaty» telearnasy
