Aqtóbe oblystyq qylmystyq ister jónindegi mamandandyrylǵan aýdanaralyq sotynda mektep túlegine qatysty sot otyrysy bastaldy. Bi alańynda bir-biriniń aiaǵyn basyp ketken mektep túlekteri keiin máseleni jeke sheshken, dep habarlaidy QazAqparat tilshisi.
Aqtóbede eki mektep túlegi arasyndaǵy ózara kelispeýshilik ólimmen aiaqtaldy. Buǵan deiin habarlaǵanymyzdai, pyshaq jaraqatynan №19 orta mektep túlegi Azat Dúsipov aýrýhananyń jansaqtaý bóliminde qaza tapty. Al búgin negizgi sot otyrysy bastalyp, prokýror Azamat Baibolatov aiyptaý qorytyndysyn oqydy. Oqýshylar arasyndaǵy janjal bi alańynda bastalǵan.
«2018 jyldyń 17 maýsymynda saǵat 21:00 shamasynda kámeletke tolmaǵan B.Keńshilik óziniń tanysy Álibekovaǵa qońyraý soǵyp, kezdesýge kelisedi. Aiyptalýshy B.Keńshilik óziniń Baqtiiar esimdi synyptasymen birge Aqjar-2 aýylyndaǵy úiinen shyǵady. Kóshede kele jatyp, jinalmaly pyshaqty taýyp alady. Qaltasyna salyp alyp, Ardagerler úii aialdamasynyń qasyna kelip, qyzdarmen kezdesedi. Saǵat 22:30 shamasynda qyzdar úiine qaitpaq bolyp, jigitter shyǵaryp salady. Sol jerde demalys bazasyndaǵy bi alańynda bir-biriniń aiaǵyn basyp, janjaldasyp qalǵan Azat Dúsipovty kezdestiredi. Olar sol kezden beri bir-birine degen arazdyqta júrgen. Kezdesken kezde A.Dúsipov Beknaz Keńshilikti taldardyń arasyna aparyp, tóbelesedi. Basqa dostary men qyzdar ekeýiniń áńgimesine aralaspaǵan. A.Dúsipov óziniń aiaǵyn basyp ketken B.Keńshilikti bólek shyǵaryp alǵan soń balaǵattap, urǵan», - dedi memlekettik aiyptaýshy Azamat Baibolatov.
Is materialyna súiensek, tóbeles kezinde aiyptalýshy B.Keńshilik qolyndaǵy pyshaqty siltep qalady. Saldarynan jábirlenýshi A.Dúsipovtyń júregi men ókpesi jaralanyp, kóp qan joǵaltady. Sol kúni A.Dúsipov oblystyq balalar aýrýhanasynyń jansaqtaý bóliminde tańǵy saǵat 5:35-te kóz jumdy. Al aiyptalýshy B.Keńshilik oqiǵa ornynan ketip, úiine barǵan.
Aita keteiik, qazirgi ýaqytta Qylmystyq kodekstiń «Adam óltirý» babynyń ekinshi tarmaǵy boiynsha is qozǵaldy. Sot otyrysy jalǵasyp jatyr.
