اقتٶبە وبلىستىق قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىندا مەكتەپ تٷلەگٸنە قاتىستى سوت وتىرىسى باستالدى. بي الاڭىندا بٸر-بٸرٸنٸڭ اياعىن باسىپ كەتكەن مەكتەپ تٷلەكتەرٸ كەيٸن مەسەلەنٸ جەكە شەشكەن, دەپ حابارلايدى قازاقپارات تٸلشٸسٸ.
اقتٶبەدە ەكٸ مەكتەپ تٷلەگٸ اراسىنداعى ٶزارا كەلٸسپەۋشٸلٸك ٶلٸممەن اياقتالدى. بۇعان دەيٸن حابارلاعانىمىزداي, پىشاق جاراقاتىنان №19 ورتا مەكتەپ تٷلەگٸ ازات دٷسٸپوۆ اۋرۋحانانىڭ جانساقتاۋ بٶلٸمٸندە قازا تاپتى. ال بٷگٸن نەگٸزگٸ سوت وتىرىسى باستالىپ, پروكۋرور ازامات بايبولاتوۆ ايىپتاۋ قورىتىندىسىن وقىدى. وقۋشىلار اراسىنداعى جانجال بي الاڭىندا باستالعان.
«2018 جىلدىڭ 17 ماۋسىمىندا ساعات 21:00 شاماسىندا كەمەلەتكە تولماعان ب.كەڭشٸلٸك ٶزٸنٸڭ تانىسى ەلٸبەكوۆاعا قوڭىراۋ سوعىپ, كەزدەسۋگە كەلٸسەدٸ. ايىپتالۋشى ب.كەڭشٸلٸك ٶزٸنٸڭ باقتييار ەسٸمدٸ سىنىپتاسىمەن بٸرگە اقجار-2 اۋىلىنداعى ٷيٸنەن شىعادى. كٶشەدە كەلە جاتىپ, جينالمالى پىشاقتى تاۋىپ الادى. قالتاسىنا سالىپ الىپ, ارداگەرلەر ٷيٸ ايالداماسىنىڭ قاسىنا كەلٸپ, قىزدارمەن كەزدەسەدٸ. ساعات 22:30 شاماسىندا قىزدار ٷيٸنە قايتپاق بولىپ, جٸگٸتتەر شىعارىپ سالادى. سول جەردە دەمالىس بازاسىنداعى بي الاڭىندا بٸر-بٸرٸنٸڭ اياعىن باسىپ, جانجالداسىپ قالعان ازات دٷسٸپوۆتى كەزدەستٸرەدٸ. ولار سول كەزدەن بەرٸ بٸر-بٸرٸنە دەگەن ارازدىقتا جٷرگەن. كەزدەسكەن كەزدە ا.دٷسٸپوۆ بەكناز كەڭشٸلٸكتٸ تالداردىڭ اراسىنا اپارىپ, تٶبەلەسەدٸ. باسقا دوستارى مەن قىزدار ەكەۋٸنٸڭ ەڭگٸمەسٸنە ارالاسپاعان. ا.دٷسٸپوۆ ٶزٸنٸڭ اياعىن باسىپ كەتكەن ب.كەڭشٸلٸكتٸ بٶلەك شىعارىپ العان سوڭ بالاعاتتاپ, ۇرعان», - دەدٸ مەملەكەتتٸك ايىپتاۋشى ازامات بايبولاتوۆ.
ٸس ماتەريالىنا سٷيەنسەك, تٶبەلەس كەزٸندە ايىپتالۋشى ب.كەڭشٸلٸك قولىنداعى پىشاقتى سٸلتەپ قالادى. سالدارىنان جەبٸرلەنۋشٸ ا.دٷسٸپوۆتىڭ جٷرەگٸ مەن ٶكپەسٸ جارالانىپ, كٶپ قان جوعالتادى. سول كٷنٸ ا.دٷسٸپوۆ وبلىستىق بالالار اۋرۋحاناسىنىڭ جانساقتاۋ بٶلٸمٸندە تاڭعى ساعات 5:35-تە كٶز جۇمدى. ال ايىپتالۋشى ب.كەڭشٸلٸك وقيعا ورنىنان كەتٸپ, ٷيٸنە بارعان.
ايتا كەتەيٸك, قازٸرگٸ ۋاقىتتا قىلمىستىق كودەكستٸڭ «ادام ٶلتٸرۋ» بابىنىڭ ەكٸنشٸ تارماعى بويىنشا ٸس قوزعالدى. سوت وتىرىسى جالعاسىپ جاتىر.
