Mektep oqý baǵdarlamalary mindetti túrde táýelsiz saraptamadan ótkiziletin bolady. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Jańartylǵan oqý baǵdarlamalary 2016 jyldan bastap bilim berý protsesine kezeń-kezeńimen engizilýde (2016 jyly – 1, 2017 jyly – 2, 5 jáne 7, 2018 jyly – 3, 6 jáne 8, 2019 jyly – 9 jáne 10, 2020 jyly – 11 synyptar). Úlgilik oqý baǵdarlamalary bekitilgenge deiin olardy tiisti bilim salalarynyń belgili ǵalymdary, pedagog-praktikter birneshe ret talqylady, kópshiliktiń talqylaýy jáne jurtshylyqtyń qaraýy úshin ashyq portalǵa ornalastyryldy. Sondai-aq bilim berýdiń jańartylǵan mazmunyna kóshýdiń baǵdarlamalary men kezeńderi 2016 jylǵy 31 mamyrda Parlament Májilisiniń Áleýmettik-mádeni damý komitetiniń «12 jyldyq bilim berýdi engizý jáne mektepte oqytý standarttaryn jańartý jónindegi júieli sharalar týraly» taqyrybyndaǵy otyrysynda qoldaý tapty. Budan basqa, 2017 jylǵy 22 qyrkúiekte ótken Parlament Senatyndaǵy parlamenttik tyńdaýdyń qorytyndysy boiynsha bilim berý mazmunyn jańartýǵa qatysty jumysty jalǵastyrý boiynsha usynymdar berildi», - dep atap ótedi Úkimet basshysy.
Onyń aitýynsha, bilim berýdiń jańartylǵan mazmuny engizilgenge deiin 2015 jyly 30 pilottyq mektepte oqý baǵdarlamalary, onyń ishinde Memlekettik jalpyǵa mindetti bilim berý standartynyń talaptaryn saqtai otyryp ázirlengen jańa oqý pánderi boiynsha aprobatsiia júrgizildi. Barlyq testileýlerdiń nátijeleri boiynsha pilottyq mektepter ortasha baldyń aitarlyqtai (+38,1 ball) progresine ie. Bul baqylaý mektepteriniń kórsetkishterinen eki ese (+21,3 ball) artyq.
«Oqý baǵdarlamalaryn ázirleý kezinde pánaralyq, deńgeiaralyq bailanystar eskerildi. Olar barlyq oqý pánderiniń integratsiiasyna, oqýshylardyń tutas qabyldaýy men tárbiesine yqpal etetin ortaq taqyryptar arqyly iske asyrylady. Oqý baǵdarlamalarynyń sabaqtastyǵy oqýshylardyń jas erekshelikterin eskeredi, munda oqý baǵdarlamasynyń mazmuny spiral printsipi boiynsha qarapaiymnan kúrdelige qarai tiginen de, kóldeneńinen de kúrdelene túsedi», - dedi Asqar Mamin.
Úkimet basshysy kelip túsken usynystar men usynymdardy eskere otyryp, oqý baǵdarlamalaryn jetildirý boiynsha jumys turaqty negizde júrgiziletindigin aitady.
«Sondai-aq, Parlament Májilisinde qaralyp jatqan bilim berý máseleleri jónindegi zań jobasy sheńberinde «Bilim týraly» Qazaqstan Respýblikasy Zańynyń 5-babyna oqý baǵdarlamalarynyń mindetti túrde táýelsiz saraptamadan ótýi bóliginde ózgeris engiziledi. Saraptamadan ótken oqý baǵdarlamalary bilim berý uiymdarynda synaqtan ótkiziledi», - dedi Premer-Ministr.
