Mektep kitaphanasyn qandai kitaptarmen tolyqtyrý baǵyty zertteldi. Bul týraly QR BǴM «Oqýlyq» Respýblikalyq ǵylymi-praktikalyq ortalyǵynyń direktory Ǵani Beisenbaev málim etti, dep habarlaidy QazAqparat.
«Kórkem ádebietpen mektepterdi qamtýǵa bailanysty Memleket basshysy Ulttyq qoǵamdyq senim keńesinde naqty tapsyrma bergen bolatyn. Osyǵan bailanysty «Oqýlyq» ortalyǵy jol kartasyn ázirledi. Jalpy, birinshi kezekte barlyq mektep kitaphanalaryn jetildirý úshin birneshe mindet eskerilgen. Osy oraida mektep kitaphanalaryn túgeldei jańǵyrtý arqyly balalardyń qyzyǵýshylyǵyn arttyrýǵa mán berilip otyr. Mektep kitaphanashylarynyń áleýetin kóterý, kórkem ádebietpen tolyqtyrý máselesine basa nazar aýdarý qajettigine ekpin qoiyldy», - dep toqtaldy Ǵ. Beisenbaev Bilim ministrliginiń apparat jinalysynda.
Onyń sózine qaraǵanda, mektep kitaphanalaryn negizinen tórt baǵyttaǵy ádebiettermen qamtý josparlanǵan. Bul turǵyda anyqtamalyq basylymdar, ǵylymi tanymdyq, otandyq ári álemdik eń úzdik shyǵarmalar toptamasy, qosymsha oqý ádistemelik ádebietter qamtylady.
«Osylardyń barlyǵy mektep kitaphanasynda óte qajet bolyp tur. Bul baǵyttaǵy tiisti institýttardyń mamandary óz úlesterin qosyp, jol kartasyn iske asyrýǵa atsalysýda. Jalpy, mektep kitaphanasynyń tiisti talaptarǵa sáikes bolýy úshin kitaphanashylardyń da kadrlyq áleýetin kóterý máselesine ekpin qoiylýda. Búkil kitaphanalardy tsifrlyq tehnologiialarmen tolyqtyrý jaǵy da qolǵa alyndy», - dedi ortalyq basshysy.
«Jumys toby aýqymdy sharalardy bastap ketti. Qazaqstan boiynsha shyqqan kórkem ádebietterdiń tizimi daiyndaldy. Onyń ishinde 30 myńnan astam ádebiettiń arasynda irikteý jumystary júrgizildi. Osy oraida árqaisysyn bastaýysh mektepke, jalpy mektepke, kolledjge, joǵary oqý ornyna kerekti kórkem ádebiet tizbesin iriktep, sodan keiin 5 myńǵa jýyq kitap qaldy. Bul tizimdi ary qarai shyńdaý baǵytynda tiisti institýttar pysyqtaý sharalaryn atqardy. Komissiia jumysynda mektep kitaphanasyna qajetti kórkem ádebietterdiń tizimin quramyz», - dedi Ǵani Beisenbaev.
Budan buryn habarlanǵandai, jaqynda Ulttyq qoǵamdyq senim keńesiniń 4-otyrysynda Memleket basshysy Qasym-Jomart Toqaev dástúrli kitaphananyń aǵartýshylyq róli eshqashan mánin joǵaltpaitynyn aitqan edi.
«Taǵy bir mańyzdy mindet - mektep kitaphanalarynyń kitap qoryn jańalaý jáne tolyqtyrý. Qazir bul kitaphanalardyń qory eskirgen ári jutań. Ásirese, kórkem týyndylar men tartymdy ádebietter tapshy. Qazaq tilindegi tiisti ádebietter óte az nemese múldem joq», - dedi Memleket basshysy.
Qazaqstan Prezidentiniń atap ótýinshe, oqýshylardyń álem ádebieti klassikteriniń shyǵarmalaryna qoly jete bermeidi.
