Mektep ishinde ornalasqan jylytý qazandyǵy oqýshylardyń ómirine qaýip tóndiredi. Bul týraly QR BǴM Mektepke deiingi jáne orta bilim komitetiniń tóraǵasy Maira Meldebekova aitty, dep habarlaidy QazAqparat.
Onyń atap ótýinshe, elimizdegi jalpy bilim berý uiymdarynyń 11,3 paiyzy ǵana nemese 823 uiym Ishki ister ministrligi Jedel basqarý ortalyǵynyń bazasyna qosylǵan. Mektepterde 25 640 vahterler men kúzetshiler qyzmet jasaidy. Sondai-aq mektepterdiń 6,4 paiyzy mamandandyrylǵan kúzet qyzmetiniń qaraýyna alynǵan.
«Bes óńirde mundai mamandandyrylǵan kúzet qarastyrylmaǵan. Olar: Almaty, Jambyl, Qostanai oblystary jáne Shymkent pen Qyzylorda qalalary. Mektepterdiń 14 paiyzynda ǵana dabyl túimeshegi bar. Bul jalpy 6 152 mektepte dabyl túimesheginiń joq ekendigin bildiredi. Sondyqtan árbir bilim berý uiymy bul aqparattardy baqylaýǵa alyp, júzege asyrylýyn qamtamasyz etýi tiis», - dedi ol.
Sonymen qatar komitet tóraiymy mektep ishinde ornalasqan jylytý qazandyqtary da oqýshylardyń ómirine qaýip tóndiretindigin aitady.
«Elimizdiń 256 mektebinde, onyń ishinde qalada 9, aýyldyq jerlerde 247 mektepte osyndai qazandyqtar anyqtaldy. Olardyń kóbi Aqmola, Qostanai, Aqtóbe jáne Túrkistan oblystarynda. Atalǵan másele boiynsha jol kartasyn ázirledik. Osy jol kartasyna sáikes, 2021-2022 jyldary bul jumystar barlyq óńirde tolyq oryndalyp, qazandyqtar qaýipsiz jerge shyǵarylýy tiis»,- dedi komitet tóraǵasy.
