Bilim jáne ǵylym vitse-ministri Sholpan Karinova mektep, kolledj jáne balabaqsha direktorlaryna nelikten jańa talaptar qoiylyp jatqanyn túsindirdi, dep habarlaidy QazAqparat.
«Buiryqqa ózgeris engizýdegi negizgi maqsat – mektep pen kolledj, balabaqsha, qosymsha bilim berý mekemeleriniń basshylaryn neǵurlym sapaly deńgeide daiyndaý. Sondyqtan úmitkerlerge aldaǵy ýaqytta joǵary talap qoiylady. Osy mekemelerdiń basshysy bolamyn degen adamdarǵa qoiylatyn talaptar boiynsha tiisti qujat bekitiledi. Bastysy – bilim sapasy. Bilim sapasyna áser etetin ári jaqsartatyn birden-bir adam – basshy. Sondyqtan, ary qarai da kelesi normativti qujatta biz osy bilim berý mekemeleriniń basshylaryn taǵaiyndaýmen qatar, olardyń atttestattaý tártibin de ózgertetin bolamyz», - dedi Sholpan Karinova vedomstvonyń otyrysynda.
Vitse-ministrdiń aitýyna qaraǵanda balabaqsha, mektep nemese kolledj bolsyn – barlyǵynyń direktorynyń eńbekaqysy attestattaý nátijesine bailanysty bolady.
«Búgingi kúni olar nátije boiynsha birinshi, ekinshi jáne úshinshi dárejeli basshylar bolyp bekitilgen. Olardyń árqaisysynyń biliktilik talaptary aiqyndalǵan. Osy talaptarǵa sai kelgen jaǵdaida jáne tiisti ulttyq sanaq testileýinen ótken kezde, ekinshi kezeńinde mektep, kolledjdiń damý josparyn bekitip, iske asyrylýynyń nátijesin kórsete bilgen jaǵdaida – attestattaý qorytyndysy boiynsha sheshim qabyldanady. Munyń barlyǵy – búgingi kúni bilim salasynyń aldyna qoiylyp otyrǵan talaptardyń óte joǵary ekenin kórsetedi», - dedi ol.
Eske sala ketsek, vitse-ministr munyń aldynda bilim mekemesiniń direktoryn tańdaýda Prezident kadr rezervi men «Bolashaq» baǵdarlamasynyń qatysýshylaryna basymdyq beriletinin aitqan edi.
