Jańa oqý jyly bastalǵaly bilim jáne ǵylym salasynda sapany qamtamasyz etý komitetine 70-ke jýyq aryz-shaǵym tústi.
Eki apta ishinde pedagog quqyǵyn buzý jaǵdaiynyń basym bóligi Túrkistan jáne Almaty oblystarynda tirkelgen.
"Máselen, Túrkistan oblysynyń Saryaǵash aýdanynda muǵalimder B.Omarov atyndaǵy №50 mektep direktory mindetin atqarýshynyń áreketine aryzdandy. Ol pedagogterdi kýrorttyq aimaqta golf alańyn tazalaýǵa májbúrlegen. Máseleniń mán-jaiy anyqtalǵannan keiin laýazymdy tulǵa qyzmetinen bosatyldy", - deidi komitet mamandary.
Al Túrkistan oblysynda balabaqsha tárbieshisi qyzmetinen zańsyz bosatylǵan. Alaida ákimdiktiń bilim basqarmasy tiisti shara qabyldaǵan joq. Bilim salasynda sapany qamtamasyz etý jónindegi aýmaqtyq departament qyzmetkerleri aralasqannan keiin ǵana tárbieshi burynǵy jumysyna qaita oraldy.
"Almaty oblystyq departamentine muǵalim ótinishi túsken. Ol bilim berý uiymdarynda aqsha jinaý jáne muǵalimderge tán emes fýnktsiialarǵa tartý faktileri týraly habarlaǵan. Tekeris kezinde barlyǵy rastaldy. Al Tekeli qalasynyń №6 orta mektep direktoryn qyzmetinen bosatý týraly sheshim qabyldandy. Sonymen qatar, Tekeli qalasy ákimdiginiń bilim bólimi basshysy mindetin atqarýshyny tártiptik jaýapkershilikke tartý usynyldy", - deidi komitet qyzmetkerleri.
Budan bólek, Atyraý oblysynda Q. Ahmediiarov atyndaǵy orta mektep muǵalimi pedagogikalyq etika erejelerin buzǵany úshin jumysynan bosatyldy.
Aita keteri, bilim jáne ǵylym ministriniń tapsyrmasy boiynsha ár oblysta pedagogikalyq ádep jónindegi komissiialar quryldy. Olar pedagog quqyǵyn buzý boiynsha ótinishti shuǵyl qaraýǵa tiis.
