Foto: ortcom.kz
Tsifrlyq damý ministrligi oqýshylardy otandyq planshettermen qamtamasyz etpek. Alaida ata-analar men muǵalimder bul bastamaǵa eki jaqty pikir bildirýde. Sebebi mektepterdegi internettiń sapasy áli kúnge deiin kóńil kónshitpeidi. Bul týraly Májilis depýtaty Iýliia Kýchinskaia tómengi palata zalynda ótken Úkimet saǵatynda aitty, dep habarlaidy Azattyq Ruhy portaly.
Búgin Úkimet saǵatynda bailanys salasyn jaqsartý boiynsha Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin baiandama jasady.
Óz kezegine depýtattar jýyrda ǵana qoǵam arasynda talqyǵa túsken «oqýshylarǵa planshet berý» máselesin sóz etti.
«Búginde qoǵamda mektep oqýshylarynyń planshetke kóshý máselesi qyzý talqylanýda. Bul oqýshylardyń aýyr sómkeden qutylýyna, sondai-aq otandyq óndirýshini qoldaýǵa sep bolady. Ata-analar men muǵalimder mundai jańalyqty ártúrli qabyldady. Sebebi kóptegen mekterde internettiń sapasy áli de kóńil kónshitpeidi. Máselen 3 interaktivti taqtany qosqan kezde, internettiń jyldamdyǵy tómendep, jaǵdai qiyndai túsedi. Bul rette internetke kabelsiz qosylatyn planshetterdiń máselesi alańdatady. Onyń ústine otandyq óndirýshiler barlyq oqýshylardy planshetpen qamtamasyz etýge qaýqarly ma degen suraq ta týyndaidy. Óz kezeginje Oqý-aǵartý ministrligi qansha mektep internetpen qamtamasyz etilgenin jáne qansha mektepte internet joq ekenin aityp ótse. Sondai-aq mektepterde planshetterge qyzmet kórsetetin mamandar sany jetkilikti me? Jalpy bul jumysty kim atqarady?» - dedi Májilis depýtaty Iýliia Kýchinskaia Oqý-aǵartý ministrliginiń ókiline qoiǵan saýalynda.
Oqý-aǵartý vitse-ministri Aibat Iliiasovtyń depýtatqa aitqan jaýabynan elimizdegi mektepterdiń jartysynan kóbinde sapaly internet joq ekeni belgili boldy.
«Búgingi tańda halyqaralyq odaqtyń telekommýnikatsiia boiynsha usynymdaryna sáikes usynylatyn jyldamdyq 20 megabitti quraidy. Elimizdegi 7 600 mekteptiń 4 978-inde internettiń tómen jyldamdyǵy tirkeldi. Internet qamtamasyz etilgen jerde informatika kabinetteri bar, tehnika men jelilik jabdyqqa qyzmet kórsetýdi jabdyq jónindegi injenerler qamtamasyz etedi. Mundai kabinetter joq jerlerde mektepter derbes qamtamasyz etiledi», - dedi Oqý-aǵartý vitse-ministri.
Al Tsifrlyq damý ministri Baǵdat Mýsin mektepterdegi sapasyz internettiń máselesin direktorlardyń aqsha únemdeý tásilimen bailanystyrdy.
«Búginde internet úshin bólinetin biýdjet mektepke jetken kezde direktor ony únemdeýge tyrysady. Máselen biýdjet 20 megabittik standart paketine berilgen bolsa, direktor aqshany únemdep 8 megabitti satyp alady. Bul - birinshi másele. Ekinshi másele, operator ádette modemdi bir núktege ornatady. Eger ol tek býhgalterdiń kabinetinde bolsa, tiisinshe basqa jerlerge internet jetpeidi. Aldaǵy ýaqytta memlekettik-jekemenshik áriptestik aiasynda bul máseleler sheshiletin bolady», - dep sendirdi ministr.
Alaida Májilis depýtaty Juldyz Súleimenova mektep direktorlarynyń mundai áreketke barmaiynyn aityp, ministr Mýsinnen qisynsyz pikirdi aitpaýyn surady.
«Ol aqparatty men ózim teksergen joqpyn. Biraq ol aqparatty Oqý-aǵartý ministrligi berdi. Aqparatty ózim taratyp otyrǵan joqpyn», - dedi Baǵdat Mýsin.
Sondai-aq depýtat oqýshylarǵa taratylatyn planshetterdi zariadtaý úshin arnaiy infraqurylym kerektigin eskerip, al aýyldarda ondai múmkindik ázirge joq ekenin alǵa tartty.
«Plashetterdiń máselesi talqylaý satysynda. Bizdiń ministrlik planshetterdiń Qazaqstanda óndirilip, oqýshyǵa deiin jetkizý máselesi jáne Sim-kartamen qamtamasyz etý jumystaryn atqarady. Al mektepterdiń ishindegi infraqurylymdyq jumystardy Oqý-aǵartý ministrligi oryndaidy. Oǵan meniń qatysym joq», - dedi Mýsin.
