Sýret: muftyat.kz
Qajylyqqa barýshylardyń qan qysymy men júrek-tamyr júiesi problemalary bolǵan. Qazaqstan qajylyq missiiasy otandastarymyzdyń din aman ekenin málimdedi. Qazir 4 dáriger jáne 16 týroperatordyń árqaisyndaǵy 1 dáriger em-sharamen ainalysyp jatyr, dep habarlaidy "Ult aqparat" Qazaqstan musylmandar dini basqarmasyna silteme jasap.
Qajylyq missiiasyndaǵy dárigerler tobynyń jetekshisi Ardaq Aitbaiuly meditsinalyq ortalyq kómegine 14-16 maýsym kúnderi 703 qajy júgingenin aitty.
Olardyń qatarynda júrek-qan tamyrlary, joǵary jáne tómen tynys jáne asqazan-ishek aýrýlary jáne basqa da (mazol jaraqaty, allergiia, koniýnktivit jáne t.b.) syrqat boiynsha 120 qajy birneshe ret tekserilgen.
"15 maýsymda Muzdalifada qan qysymy kóterilgen qajyǵa jedel alǵashqy kómek kórsetilip, dárigerdiń baqylaýymen qonaqúige jóneltildi. 16 maýsymda Mina jazyǵynda tranzitorlyq ishemiialyq ustama boiynsha bir qajyǵa alǵashqy meditsinalyq kómek kórsetilip, statsionarǵa jatqyzyldy. Jamaratta shaitanǵa tas laqtyryp kele jatqan jolda qanty tómendep, esinen tanyp jatqan áiel adamǵa tez arada kómek kórsetilip, ol da statsionarǵa jetkizildi", – dep túsindirdi Ardaq Aitbaiuly.
Málimetterge súiensek, atalǵan naýqastar dárigerlerdiń tolyq baqylaýynda, jaǵdaiy birqalypty. Odan bólek, elden jetkizilgen dári-dármek qory da jetkilikti.
Eske salaiyq, buǵan deiin Mekkege qajylyqqa barǵan 550 adam aptap ystyqtan kóz jumdy. Saýd Arabiiasy ulttyq meteorologiialyq ortalyǵynyń habarlaýynsha, 17 maýsymda Mekkedegi Haram meshitinde aýa temperatýrasy 51,8 gradýsqa jetken. Saýd Arabiiasynyń zertteýine sáikes, aimaqtaǵy temperatýra ár onjyldyqta 0,4 gradýsqa kóteriledi. Qajylyqqa barǵandardyń ishinde tek bireýi adamnyń kóp bolýyna bailanysty keptelis kezinde aýyr jaraqat alyp, mert bolǵan. Sondai-aq ol adam sanyna qatysty jalpy aqparattar Mekkeniń ál-Mýaisem mańyndaǵy aýrýhana máiithanasynan alynǵanyn atap ótti.
