Jarty jyldyń qorytyndysy boiynsha Áleýmettik meditsinalyq saqtandyrý qory MÁMS paketindegi meditsinalyq kómekti tóleýge 156,7 mlrd teńgeden astam qarjy jiberdi, dep habarlady "Ult aqparat" ÁMSQ baspasóz qyzmetine silteme jasap.
Osylaisha, 6 ai ishinde MÁMS-ke 260 mlrd teńgeden astam somada jarnalar men aýdarymdar tústi. Sonymen qatar, olardyń basym bóligi - 146,6 mlrd teńge - bul halyqtyń 15 jeńildikti sanatyna jatatyn 11 mln-ǵa jýyq azamattar úshin jarnany memleket tóledi.
«Qor 2020 jyldyń 6 aiynyń qorytyndysy boiynsha MÁMS paketi sheńberinde kórsetilgen meditsinalyq qyzmetter úshin 156,7 mlrd teńgeden astam qarajat tólendi. Tólem halyqqa kórsetilgen meditsinalyq qyzmetterdiń sapasy men kólemine monitoring júrgizilgennen keiin ǵana júzege asyrylady. Klinikalyq hattamalardy jáne emdeýge qajetti talaptardy saqtai otyryp, fakti boiynsha kórsetilgen jáne qujatpen rastalǵan qyzmetter ǵana tólenedi» - delingen habarlamada.
Qordyń baspasóz qyzmetinde túsindirgendei, MÁMS úshin jarnalar men aýdarymdar Áleýmettik meditsinalyq saqtandyrý qorynyń ózine emes, Ulttyq banktegi arnaiy shotqa túsedi. Ol jerden qarajat MÁMS paketi boiynsha kórsetilgen meditsinalyq qyzmetterge aqy tóleýge meditsinalyq uiymdar – Qordyń jetkizýshilerine jiberiledi.
Qorda naqtylaǵandai, jarty jyldyqtaǵy shyǵyndardyń basym bóligi statsionarlyq meditsinalyq kómek tólemi - 50 mlrd teńgeden astam. 6 ai ishinde josparly túrde elimizdiń statsionarlarynda 630 myńnan astam adam emdeldi.
Kórsetilgen konsýltatsiialyq-diagnostikalyq kómek úshin shamamen 42 mlrd teńge tólendi. Atap aitqanda, diagnostikalyq qyzmetter arasynda KT jáne MRT qyzmetteri azamattar úshin ózekti. Jarty jyl ishinde patsientterge 1,1 mlrd teńgeden astam somaǵa 96 myńnan astam KT qyzmeti jáne 1,6 mlrd teńgeden astam somaǵa 101 myńnan astam MRT qyzmeti kórsetildi.
Sonymen qatar, qańtar men maýsym aralyǵynda 3 mln-nan astam stomatologiia, 2 mln-ǵa jýyq rentgen jáne 1,6 mln-nan astam ÝDZ-diagnostika qyzmetteri kórsetildi, olardyń jalpy quny 15 mlrd teńgeden asady. Olardyń barlyǵy MÁMS paketinde meditsinalyq saqtandyrý qarajaty esebinen kórsetildi, patsientterge meditsinalyq kómek úshin Qor aqy tóledi.
Aita ketsek, birinshi jartyjyldyqta barlyq qazaqstandyqtar MÁMS júiesinde shartty túrde saqtandyrylǵan jáne meditsinalyq qyzmetterdi kepildi kómek aiasynda, sondai-aq MÁMS aiasynda paidalana alatyn.
