Foto: akzhol.kz
"Aq jol" partiiasynyń múshesi, Jambyl oblystyq máslihatynyń depýtaty Muhanbetaly Shalqarbekovke alaiaqtyq jasady degen aiyp taǵyldy, dep habarlaidy "Ult aqparat" Stan.kz aqparat agenttigine silteme jasap.
Almatydaǵy jer telimderi qatysty alaiaqtyq isi boiynsha aiyptalýshy retinde Jambyl oblystyq máslihatynyń depýtaty Muhanbetaly Shalqarbekov sotqa tartyldy. Depýtat taǵylǵan aiypty moiyndamaitynyn aitty.
Depýtat asfalt-beton ónimderin óndirip, satýmen ainalysatyn "ABZ Aqtas" JShS-niń basshysy. Tergeýshilerdiń aitýynsha, depýtat investitsiialyq joba – meditsinalyq pýnkt qurylysy úshin Almaty qalasy Bostandyq aýdanynan jer telimin alý úshin qujattaryn tapsyrǵan.
"2019 jyly Shalqarbekov belgisiz tulǵalar arqyly investitsiialyq jobany júzege asyramyn degen jeleýmen jer telimin zańdy ainalyp ótip, alaiaqtyq jolmen kadastrlyq quny boiynsha alýǵa, odan keiin jer telimin jeke menshigine ainaldyryp, paidalanýǵa bolatynyn bilgen”, – delingen aiyptaý qorytyndysynda.
Tergeýshilerdiń aitýynsha, meditsinalyq pýnkt qurylysy úshin degen sebep tek jer telimin alý shemasy ǵana. Olar eshqandai meditsinalyq pýnkt salýdy josparlanbaǵan, tek 0,0657 gektar jer telimin jalǵa alyp, keiin jekemenshikke ótkizýdi kózdegen.
Qujattarǵa Almaty qalasynyń burynǵy bas sáýletshisi Almashan Ahmedjanov pen qalalyq jer qatynastary basqarmasynyń burynǵy basshysy Ardaq Samambetov qol qoiǵan. Atalmysh jer teliminde basqa maqsattaǵy ǵimarat salynsa da, qujat boiynsha meditsinalyq ortalyq dep qabyldanǵan, al keiinnen jer telimin naryqtyq quny 80 mln teńge bola tura, 5,4 mln teńgege satyp alýǵa ruqsat berilgen.
"Shyn máninde, meditsinalyq ortalyq salynbaǵan jáne jumys istemeidi. Samambetov pen Ahmedjanov qyzmet babyn paidalanyp, Shalqarbekovke jer telimin "ABZ Aqtas" JShS-niń jeke menshigine ótkizýine kómektesken. Keiin Shalqarbekov jer telimin ulynyń atyna aýystyrǵan", – delingen aiyptaý qorytyndysynda.
Almaty sotynda qalanyń burynǵy bas sáýletshisi Almashan Ahmedjanovqa qatysty alty adam: úsh eks-sheneýnik, kásipker, baǵalaýshy jáne depýtattyń isi boiynsha aldyn ala tyńdaý bastaldy.
