Elordada meditsinalyq maska baǵasynyń qymbattap ketpeý sharalary júrgizilýde. Bul týraly koronavirýstyq infektsiianyń ákelinýi men taralýynyń aldyn alý maqsatynda ótken brifingte aityldy.
«Búgingi tańda Nur-Sultan qalasyndaǵy bólshek saýdada meditsinalyq maskanyń jetispeýshiligi baiqalady. Keshe Nur-Sultan qalasy ákimdigi janynan qurylyp, distribiýtor, jetkizýshi, dárihana jelilerimen birigip shtab quryldy. Aldymen bul belgili bir deńgeide qoldan jasalǵan dúrligý deýge bolatynyn aityp ótý kerek. Bizdiń eldegi meditsinalyq maska shyǵarýshylar shikizat bolmaýy sebepti tyǵyryqqa tireldi. Úkimet jaqyn ornalasqan memleketterden shikizat jetkizý máselesin sheship jatyr. Jaqyn arada dúrligý basylady dep oilaimyz», - deidi «QR farmetsevtikalyq qyzmettin qoldaý jáne damytý qaýymdastyǵy» ZTB Nur-Sultan qalasy filialynyń direktory Gúlsarai Almýrzina.
Onyń aitýynsha, qaýymdastyq qalalyq ákimdik, QR DSM Taýarlar men kórsetiletin qyzmetterdiń sapasy men qaýipsizdigin baqylaý komiteti birlesip meditsinalyq maska baǵasynyń qymbattap ketpeýin qadaǵalaý sharalaryn júrgizgen.
«Qarapaiym meditsinalyq maskanyń baǵasy 30 teńgeden kóterilgen joq. Tutynýshyǵa 10-20-dan artyq satylmaǵan. Qaýymdastyqqa kirmegen dárihana jelileri de bar, olar osy jaǵdaidy paidalanyp baǵasyn kótergen bolýy múmkin. Negizinde meditsinalyq maskany adam kóp jinalǵan qoǵamdyq orynda jáne aýyrǵan kezde taǵý kerek. Dárihanalarda balalarǵa jáne eresekterge arnalǵan antibakterialdy, antiseptikalyq suiyqtyqtar bar. Onymen qol jýýǵa bolady», - deidi ol.
