Qazirgi ýaqytta MÁMS arqyly biýdjet kólemi 1,6 trillionǵa deiin artyp otyr. Bul týraly Ortalyq kommýnikatsiialar ortalyǵynda ótken brifingte QR Densaýlyq saqtaý vitse-ministri Oljas Ábishev málim etti, dep habarlaidy QazAqparat.
«Biz 1 qańtardan bastap mindetti áleýmettik meditsinalyq saqtandyrý jobasyn iske asyra bastadyq. Bul jobanyń artyqshylyǵy - azamattar eki paketti: memleket tarapynan kepildendirilgen saqtandyrýdy jáne qosymsha Mindetti áleýmettik meditsinalyq saqtandyrýdy (MÁMS) qoldana alady. Kóptegen azamattan »Eger men saqtandyrylmaǵan bolsam qajet jaǵdaida meditsinalyq mekeme meditsinalyq kómek kórsetpei me?« degen suraq qoiylyp jatady. Bul aqparat tolyǵymen durys emes, sebebi bizde joǵaryda atap ótkendei eki paket te qoldanylady», - deidi Oljas Ábishev.
Onyń aitýynsha, buryn meditsinalyq qyzmetter tiziminiń biýdjeti 1 trillionǵa jetetin bolsa, qazirgi ýaqytta MÁMS arqyly biýdjet kólemi 1,6 trillionǵa deiin artyp otyr.
«Eger mindetti áleýmettik meditsinalyq saqtandyrylǵan bolsańyz ońaltý, diagnostika jasaý, profilaktika, MRT siiaqty qosymsha meditsinalyq qyzmet úshin qarajat talap etilmeidi», - deidi ol.
