2020 jyldyń 9 aiynda Ulttyq shuǵyl meditsinany úilestirý ortalyǵynyń meditsinalyq aviatsiia jelisi 1 647 ushý oryndady. Bul týraly QR Densaýlyq saqtaý ministrliginiń baspasóz qyzmetinen málim etti, dep habarlaidy "Ult aqparat".
Vedomstvo málimetinshe, osy jyldyń qańtar-qyrkúieginde meditsinalyq aviatsiia mamandary 3 185 patsientke meditsinalyq kómek kórsetip, 3 684 meditsinalyq qyzmetti júzege asyrdy. Onyń ishinde 1 896 patsient tasymaldanyp, 188 naýqasqa keńes berildi. Sonymen qatar mamandar 128 ota jasap, 1 472 telemeditsinalyq keńes kórsetti. Osy kezeńde meditsinalyq aviatsiia donorlyq organdardy tasymaldaý maqsatynda 2 ret ushyp shyqty.
Meditsinalyq aviatsiia balalar patologiiasy, jaraqattar, jazataiym oqiǵalar jáne ýlanýlar, akýsherlik-ginekologiialyq patologiia, qan ainalymy júiesiniń aýrýlary, jańa týǵan náresteler patologiiasy jáne basqa da aýrýlar kezinde shuǵyl kómek kórsetý úshin attanady.
Aita keterligi, Ulttyq shuǵyl meditsinany úilestirý ortalyǵy shetelde qiyn jaǵdaida jatqan Qazaqstan azamattaryn nemese qandastardy halyqaralyq tasymaldaýdy da uiymdastyrady. Máselen, osy jyldyń 9 aiynda elimizdiń meditsinalyq aviatsiiasynyń kómegimen sheteldik klinikalardan otandyq meditsinalyq uiymdarda emdeýin jalǵastyrý úshin QR azamattaryn tasymaldaý maqsatynda 8 ushý oryndaldy.
Jalpy 2011 jyldan bastap jyldyń 9 aiy ishinde otandyq meditsinalyq aviatsiia Tailand, Túrkiia, Shveitsariia, AQSh, Ońtústik Koreia, Mysyr, Qyrǵyzstan, Qytai Halyq Respýblikasy, Resei Federatsiiasy syndy taiaý jáne alys shet elden Qazaqstan azamattaryn elge jetkizý úshin 80 ret ushyp shyqqan bolatyn.
