Májilis depýtaty, Áleýmettik-mádeni damý komitetiniń múshesi Gúldara Nurymova densaýlyq saqtaýdy tsifrlandyrý jumystary dárigerler eńbegin jeńildetpedi, kerisinshe kúrdelene tústi dep synǵa aldy, dep habarlaidy QazAqparat.
«Ekinshi jyl qatarynan densaýlyq saqtaý salasy pandemiia jaǵdaiynda aýqymdy júktememen jumys istep jatyr jáne ekinshi jaǵynan, densaýlyq saqtaýdaǵy tsifrlandyrýdy qalyptastyrýdyń kúrdeli kezeńin bastan keshýde. Densaýlyq saqtaýdy tsifrlandyrý dárigerlerdiń eńbegin jeńildetken joq. Kerisinshe, dáriger men medbikeniń jumysy kúrdelene tústi. Biz «Nur Otan» fraktsiiasynyń depýtattar toby biylǵy 2 maýsymda patsient qabyldaýda praktikalyq dárigerdiń qalai jumys isteitinine, óz jumysynda naqty qandai problemalar bolatynyna kóz jetkizý úshin Nur-Sultan qalasynyń №5 qalalyq emhanasyna bardyq. Kezdesý Densaýlyq saqtaý ministrligi, Respýblikalyq elektrondyq densaýlyq saqtaý ortalyǵy, Damýmed, salalyq kásipodaq ókilderiniń qatysýymen uiymdastyryldy. Naýqasty qabyldaýdyń jalpy tájiribelik dárigerdiń barlyq máselelerin kezeń-kezeńimen taldadyq», - dedi depýtat QR Parlamenti Májilisiniń Áleýmettik-mádeni damý komitetinde ótken dóńgelek ústelde.
Onyń aitýynsha, №626 buiryqqa sáikes barlyq aýrýlar Tegin meditsinalyq kómektiń kepildik berilgen kólemi (aýrýlardyń 25 toby jáne áleýmettik mańyzy bar aýrýlar: týberkýlez, onkologiia, psihikalyq jáne juqpaly aýrýlar, qant diabeti) jáne Memlekettik-áleýmettik meditsinalyq saqtandyrý bolyp bólinedi.
«Qarjylandyrý kózine (TMKKK nemese MÁMS) sáikes qajetti aýrý kodyn, qajetti qyzmetterdi tabý jáne joldamaǵa durys engizý úshin dárigerge qansha ýaqyt qajet ekenin elestetip kórińiz. Mindetti meditsinalyq densaýlyq saqtaý qorynyń árbir meditsinalyq uiymyna ázirlenip, túsiriletin eki derekkóz (TMKKK jáne MÁMS) boiynsha ai saiynǵy qarjylandyrý jospary bolǵandyqtan, dáriger asyra oryndamaý úshin qolda bar jospardy oryndaýǵa májbúr. Qarjylandyrýdyń osyndai kúrdeli bólinýimen shatasýlar bolady, qate jiberiledi», - deidi G. Nurymova.
Onyń aitýynsha, Qazaqstan boiynsha meditsinalyq aqparattyq júieniń negizgi jetkizýshisi Damýmedti monopolist dep ataýǵa bolady, onyń jumysynda kóptegen máseleler bar.
«Damý dári-dármekpen qamtamasyz etýdiń integratsiialanǵan júiesi portalymen jáne fertildi jastaǵy áielder portalymen jáne júkti áielder tirkelimimen integratsiialanbaidy. Dáriger derekterdi Damýmedke engizedi jáne barlyq tekserý derekteri men nátijelerin fertildi jastaǵy áielder, dárilik qamtý aqparattyq júiesi portalyna qaita engizýge májbúr bolady. Meditsinalyq aqparattyq júie ázirleýshileri óńirlerdegi jalǵyz jetkizýshiler retinde is júzinde bastapqy meditsinalyq sanitarlyq kómekke platformada qalai jumys isteýdi talap etedi, algoritmderdi aiqyndaidy. MAJ ázirleýshisi meditsina qyzmetkerlerimen tikelei jumys isteitin menedjerlerdi keńeitýge múddeli emes. Barlyq statistika-esep berý áli kúnge deiin Densaýlyq saqtaýdy damytý ortalyǵynyń eski formalary boiynsha tapsyrylady. Esep berýdiń jańa formalary joq. Barlyq esep qolmen jasalady», - dedi depýtat.
