Foto: Pexels.com
Búgin Qazaqstan Respýblikasy Parlamentiniń Májilisi meditsina qyzmetkerlerine qatysty kúsh qoldaný men qatygezdik áreketteri úshin jazany qatańdatýǵa baǵyttalǵan Qylmystyq jáne Qylmystyq-protsestik kodeksterge engiziletin túzetýler toptamasyn qabyldady, dep habarlaidy Ult.kz.
Zań jobasyna sáikes, Qylmystyq kodekske qyzmettik mindetin atqarý kezinde meditsina qyzmetkerleriniń, sondai-aq jedel meditsinalyq járdem brigadalary júrgizýshileriniń ómiri men densaýlyǵyna qol suǵý úshin qylmystyq jaýapkershilik kózdeitin jańa bap engiziledi.
Atap aitqanda, kúsh qoldanamyn dep qorqytqany úshin aiyppul salý, qoǵamdyq nemese túzeý jumystaryna tartý, sondai-aq 2 jylǵa deiin bas bostandyǵyn shekteý ne aiyrý jazasy qarastyrylǵan. Eger mundai áreketter aýyrlatatyn mán-jailarmen jasalsa, jaza 3 jylǵa deiin qatańdatylady. Al ómirge nemese densaýlyqqa qaýipti kúsh qoldaný faktileri úshin 5 jyldan 10 jylǵa deiin, al aýyrlatatyn jaǵdailarda 12 jylǵa deiin bas bostandyǵynan aiyrý jazasy kózdelgen.
Sonymen qatar Qylmystyq-protsestik kodekske osy sanattaǵy isterdi aldyn ala tergep-tekserý ishki ister organdarynyń quzyretine beriletini týraly norma engizildi.
Densaýlyq saqtaý ministrliginiń málimetinshe, 2019 jyldan beri elde meditsina qyzmetkerlerine qatysty 280-nen astam shabýyl tirkelgen, onyń 58-i biyl anyqtalǵan. Qaýipsizdikti kúsheitý maqsatynda 152 statsionarda táýlik boiy politsiia beketteri qoiylyp, jedel járdem brigadalaryna beinejetondar men dabyl túimelerin engizý jumystary jalǵasyp jatyr.
Vedomstvo meditsina qyzmetkerlerine qurmetpen qaraýǵa shaqyryp, qabyldanǵan zańnamalyq ózgerister olardyń qaýipsizdigin qamtamasyz etýge jáne qoǵamda «Zań jáne tártip» qaǵidatyn nyǵaitýǵa baǵyttalǵanyn atap ótti.
