«Meditsina qyzmetkeriniń mártebesi týraly» jeke zań ázirleý orynsyz. Bul jaiynda senatorlardyń depýtattyq saýalyna QR Premer-Ministri Asqar Maminiń jaýabynda aitylǵan, dep habarlaidy "Ult aqparat".
«Meditsina qyzmetkerlerin qoldaý maqsatynda 2020 jylǵy 7 shildedegi «Halyq densaýlyǵy jáne densaýlyq saqtaý júiesi týraly» Kodekste quqyqtardy, mindetterdi, áleýmettik qorǵaý sharalaryn aiqyndaý, patsienttiń ómiri men densaýlyǵyna ziian keltirgeni úshin kásiptik jaýapkershilikti saqtandyrý arqyly meditsina qyzmetkerleriniń mártebesin kúsheitý jónindegi normalar kózdelgen. Jańa normalarǵa sáikes meditsina qyzmetkerleriniń kólik shyǵyndaryn, laýazymdyq mindetterin atqarý kezinde ómiri men densaýlyǵyna keltirilgen ziiandy ótetýge, áleýmettik qoldaý sharalaryn, jergilikti biýdjetter qarajaty esebinen qosymsha jeńildikter men yntalandyrý tólemderin alýǵa quqyǵy bar. Osyǵan bailanysty «Meditsina qyzmetkeriniń mártebesi týraly» jeke zań ázirleýdi orynsyz dep sanaimyz», - dedi Úkimet basshysy.
Onyń atap ótýinshe, 2020-2021 oqý jylyna qoǵamdyq densaýlyq jáne gigiena, qoǵamdyq densaýlyq jáne epidemiologiia kafedralary ashyldy. Tiisti bilim berý granttaryn bólý úshin meditsina kadrlarymen, onyń ishinde epidemiologiia, infektsiialyq aýrýlar, reanimatologiia, pýlmonologiia, kardiologiia siiaqty baǵyttar boiynsha qamtamasyz etýdiń uzaq merzimdi boljamy qalyptasýda.
«2012 jyldan bastap meditsinalyq mamandyqtar boiynsha memlekettik bilim berý tapsyrysy esebinen bilim alǵan bitirýshilerdiń úsh jyl boiy mindetti jumyspen óteý normasy engizildi (elimizdiń meditsinalyq joǵary oqý oryndarynyń 2019 jylǵy túlekterine qoldanylady). Aýyldyq eldi mekenderge jumys isteýge jáne turýǵa kelgen jas mamandarǵa jergilikti atqarýshy organdar biýdjettiń múmkindigine qarai áleýmettik qoldaý kórsetedi», - dep atap ótken Asqar Mamin.
