"Mediazona" saity Rosgvardiia Ýkrainadaǵy soǵysqa barǵysy kelmegen áskerilerge qatty qysym jasap jatyr dep jazdy. Bul týraly Azattyq radiosy habarlady.
Saittyń dereginshe, júzdegen ia myńdaǵan áskeri qyzmetker soǵysqa barýdan bas tartqan.
"Áskeri jaǵdai engizilmegendikten, áskerilerge buiryq oryndamaǵany úshin qylmystyq is qozǵaý qiyn, sondyqtan komandirler qol astyndaǵylarǵa sógis jariialap, jumystan shyǵaramyn dep qorqytyp jatyr" dep jazdy «Mediazona».
Sait redaktsiiasyna túsken aýdiolardyń birinde komandir qol astyndaǵy áskerilerge "satqyn", "qorqaq", "aqymaq", "malǵun" dep ataidy. Komandirlerdiń bul sózi ótpese "eger barmasańdar, 15 jylǵa túrmede otyrasyńdar" dep qylmystyq ispen qorqytady.
AQSh barlaý qyzmetiniń málimetine súiengen The New York Times basylymy ótken aida Resei Ýkrainadaǵy soǵysqa barlyǵy 150 myń áskerin tartqanyn habarlaǵan. Arasynda jańadan áskerge alynǵan soldattar bary da belgili boldy. AQSh barlaý qyzmetiniń dereginshe, Máskeý shamamen úsh apta ishinde jeti myń soldatynan aiyrylǵan. Buǵan deiin Kreml baspasóz hatshysy Dmitrii Peskov Resei áskeriniń Ýkrainada edáýir shyǵynǵa ushyraǵanyn moiyndaǵan. Sońǵy ret Resei qorǵanys ministrligi adam shyǵyny týraly málimetti 25 naýryzda jariialaǵan. Ol kezde Ýkrainadaǵy soǵysta reseilik 1351 áskeri qyzmetkerdiń qaza bolǵany habarlandy.
24 aqpanda Resei "denatsifikatsiia" jáne "demilitarizatsiia" júrgizemiz degen jeleýmen kórshiles Ýkrainaǵa qarsy soǵys bastaǵan. Resei Ýkrainadaǵy soǵysty "áskeri operatsiia" dep ataidy, ony "soǵys" dep ataǵandardy qatań jazalaidy. BUU-ǵa múshe elderdiń basym bóligi oqiǵany Resei basqynshylyǵy dep atap, Máskeýden áskerin Ýkrainadan alyp ketýdi talap etken.
