Aǵymdaǵy jyldyń tamyz aiynda Medeý muz aidynynda «Aziia juldyzy» festivali ótedi. Bul týraly búgin Aqordada ótken Rýhani jańǵyrý jónindegi ulttyq komissiia otyrysynan keiin BAQ ókilderine suhbat bergen Almaty qalasynyń ákimi Baýyrjan Baibek aitty, dep habarlaidy QazAqparat agenttigi.
«Búgin men josparda turǵan 2 jańa bastama jaiynda aittym. Buryn almatylyqtar, jalpy qazaqstandyqtar «Aziia daýysy» jobasy týraly kóp aitatyn. Sondyqtan biz Medeý, Shymbulaqty kórsetý, jalpy Almatynyń týristik áleýetin kóterý úshin «Aziia juldyzy» degen jobany bastamaqpyz. Qyrkúiek aiynda, ózderińiz biletindei, árbir úshinshi demalys kúni "Almaty qalasy kúni" toilanady. Sol kúni Medeý muz aidynynda osyndai festivaldi ótkizý arqyly ózimizdiń mádenietimizdi Aziiaǵa pash etetin bolamyz», - dedi qala basshysy.
Munan bólek, onyń aitýynsha, «Qazaqfilm» kinostýdiiasy aýmaǵynda bos jatqan jerde etnolend jobasy qolǵa alynady. Ol jerde qala turǵyndary, aimaqtardan kelgen azamattar, sheteldik qonaqtar Almatynyń myń jyldyq tarihymen tanysa bolady.
«Belgili ǵalymymyz Karl Baipaqov Almaty qalasynda túrli qorǵandardyń óte kóp ekendigin aitqan bolatyn. Olardyń kóbi jeke kásipkerlerdiń, bankterdiń ieliginde. Biz sol jerlerdi memleket menshigine qaitaryp, ashyq aspan astyndaǵy mýzeiler jasaityn bolamyz»,- dedi Baýyrjan Baibek.
Sonymen qatar qala basshysy Almatyda ornalasqan qarjy institýttarynyń qarjysy esebinen qazirgi ýaqytta 1 mlrd. teńgeden astam somaǵa 20 joba júzege asyrylyp jatqanyn atap ótti. Máselen, jańadan qurylǵan Naýryzbai aýdanynda 500 adamǵa arnalǵan emhana men 1200 oqýshyǵa arnalǵan mektepti kásipkerler óz qarjylaryna salyp, qalaǵa syiǵa tartatyn bolady.
«Mádeniet salasynda da qalamyzdyń jetistikteri jetkilikti. Ótken jyldyń ózinde mýltimediialyq mýzyka ortalyǵyn, myńjyldyq mýzeiin ashtyq. Mýltimediialyq quraldarmen qalanyń, memlekettiń tarihyn kórsetýdemiz. Munan bólek, Sheberler aýyly, Dástúrli mýzyka teatry da ashylǵan edi», - dedi ol.
