Foto: Almaty ákimdigi
Almatyda áigili «Medeý» biik taýly sport keshenin aýqymdy qaita jańǵyrtý jumystary bastaldy. Joba nysannyń tarihi kelbetin saqtai otyryp, ony jańa tehnologiialarmen jáne ekologiialyq sheshimdermen jabdyqtaýdy maqsat etedi, dep habarlaidy Ult.kz.
Birinshi kezeńde keshenniń jańa tońazytý júiesi ornatylady, injenerlik jeliler jańartylady jáne muz jamylǵysyn baqylaýǵa arnalǵan AI-monitoring júiesi engiziledi. Bul sharalar energiia tutynýdy 25 paiyzǵa deiin azaitýǵa múmkindik beredi. Sondai-aq kórermenderge arnalǵan oryndyqtarǵa jylytý júiesi ornatylady, qonaq úi «4 juldyz» standartyna sai jańartylyp, sportshylarǵa arnalǵan ońaltý ortalyǵy ashylady.
Kelesi kezeńde jylytý júiesi bar ashyq bassein, ekologiialyq serýen baǵyty bar eko-park, panoramalyq kópirler men terrassalar, kofeinialar aimaǵy jáne interaktivti mýzei salý josparlanyp otyr.
Jańǵyrtý jumystary 2027 jyldyń IV toqsanynda aiaqtalady dep josparlanǵan.
