Parlament Májilisiniń jalpy otyrysynda Juldyz Súleimenova jańa mektepter qurylysyna kedergi bolatyn túiindi máselelerdi kóterdi. Osy oraida depýtat QR Premer-Ministriniń birinshi orynbasary Álihan Smaiylovtyń atyna saýal joldady, dep habarlaidy QazAqparat.
«Memleket basshysynyń Joldaýynda jańa mektepter sanyn 800-den 1000-ǵa deiin arttyrý tapsyryldy. Alaida, ony túpkilikti sheshýde áli de túiindi máseleler bar. Eń basty másele, memlekettik biýdjet qarajatynyń durys josparlanbaýy. Orta bilim berý obektileriniń qurylysy biýdjet qarajaty esebinen únemi jetkiliksiz qarjylandyrylýda. Atap aitqanda, qazir mektepter qurylysyna jan basyna shaqqandaǵy normativti esepteý ádistemesi 6 ailyq eseptik kórsetkish bazalyq tarifine negizdelgen. Alaida, 2019 jyly respýblikalyq biýdjet komissiiasynyń sheshimimen QR Úkimetiniń Qaýlysyna sáikes, úsh aýysymdy, apatty mektepterdi jáne oqýshy oryndarynyń tapshylyǵyn joiý maqsatynda mektepter salýǵa arnalǵan bazalyq normativ 6 ailyq eseptik kórsetkishten 9 ailyq eseptik kórsetkishke deiin kóterilgen. Iaǵni, 6 ailyq eseptik kórsetkish bazalyq tarifi mektep qurylysyn salýǵa jetkiliksiz ekendigi 2019 jyldyń ózinde belgili bolǵan», - dedi J. Súleimenova.
Onyń aitýynsha, osy kezge deiingi esepteýler eski normativtermen júrgizilip keledi. Biyl jalpy sipattaǵy transfertterden 200 mekteptiń qurylysyna 95,7 mlrd teńge kózdelgen. Qosymsha qarajat 53 mlrd teńge jumyspen qamtýdyń jol kartasynan bólingen. Atalǵan qarajattyń aimaqtarǵa der kezinde jetpeýinen búginde 13 mektep merziminen kesh berilmek. Biýdjettiń durys josparlanbaýy saldarynan jergilikti atqarýshy bilik organdary bilim berý obektilerin ýaqytyly eksplýatatsiiaǵa engizýde qosymsha qarajat izdeýge májbir.
«Eń ókinishtisi, jańa biýdjettiń jobasynda osy jaǵdai qaitalanyp otyr. Máselen, kelesi jylǵa 200 mekteptiń qurylysyna jalpy sipattaǵy transfertterden 104 mlrd teńge kózdelgen, bul ótken jylmen salystyrǵanda 44 mlrd teńgege az. Tek qurylys materialdary baǵasynyń 30%-ǵa óskenin eskersek, búgingi kúnniń ózinde bul qarajattiń jetkiliksiz ekeni aitpasa da túsinikti. Qarajat tapshylyǵy kem degende 50 mlrd teńgeni quraidy», - dedi depýtat.
Osy oraida «Nur Otan» partiiasy fraktsiiasy músheleri kelesi usynystardy engizdi:
- Qazaqstan Respýblikasynyń Úkimetine 1000 mektepti salý jónindegi keshendi is-sharalar josparyn qabyldaý;
- Kelesi jyldan bastap mektepter qurylysyna 9 ailyq eseptik kórsetkish bazalyq tarifin qoldaný;
- Mektepter qurylysyn standartyn ózgertý eskerilgen.
