Májilis depýtaty Maqsat Ramanqulov tehnikalyq qyzmetkerlerdiń jalaqysyn kóterý máselesin kóterdi. Osy oraida QR Premer-Ministriniń orynbasary Eraly Toǵjanovtyń atyna depýtattyq saýal joldady, dep habarlaidy "Ult aqparat".
«Memleket áleýmettik salaǵa jiti nazar aýdaryp keledi, bul ásirese pandemiia kezinde aiqyn kórinis tapty. Pandemiia kezinde «Pedagog mártebesi týraly» zań qabyldanyp, dárigerlerge qosymsha tólemder engizildi. Jyl saiyn muǵalimder men dárigerlerdiń jalaqysy 20-30 paiyzǵa artyp keledi. Munyń bári óte oryndy, biz rizashylyǵymyzdy bildiremiz jáne osyndai kózqarasty árdaiym qoldaimyz. «Aq jol» partiiasyna osy sektorlardyń qatardaǵy qyzmetkerleri, iaǵni sanitarlar, assistentter, eden jýýshylar, jedel járdem júrgizýshileri, murajai, óner, mektep, balabaqsha, kitaphana, muraǵat salasyndaǵy ózge de qyzmetkerler olardyń áriptesteri úshin memleket jyl saiyn jalaqyny kóbeitse, al sol salalardaǵy tehnikalyq qyzmetkerlerdiń jalaqysy qatarynan kóptegen jyldar boiy ózgerissiz qalady degen shaǵymdarmen jii júginedi», - dep toqtaldy depýtat Májilistiń jalpy otyrysynda.
Onyń aitýynsha, keibir jerde jedel járdem júrgizýshileriniń jalaqysy - shamamen 70-75 myń teńge jáne 5 jyldan astam ýaqyt boiy joǵarylaǵan joq. Mektepter men balabaqshalardyń tehnikalyq qyzmetkerleriniń jalaqysy – shamamen 50 myń teńge.
«Sonymen qatar, infliatsiianyń ekonomikalyq sipatyn eshkim joiǵan joq, memlekettik organdar taýarlar men azyq-túlik baǵasynyń ósýin aitpaǵannyń ózinde, turǵyn úi kommýnaldyq sharýashylyǵyndaǵy monopolisterdiń tarifterin ulǵaitýǵa únemi kelisedi. Bizdiń azamattarymyzdyń bul sanaty tipti ipoteka boiynsha turǵyn úige qol jetkize almaidy jáne ondaǵan jyldar boiy jaldamaly páterlerde turady. Jalaqylaryna durys kiine almaidy, balalaryn asyrai almaidy, kúndelikti máselelerdi sheshe almaidy. Osyndai jalaqyǵa qalai ómir súrsin?», - dedi Maqsat Ramanqulov.
Osyǵan bailanysty «Aq jol» fraktsiiasy áleýmettik saladaǵy jalaqyny kóterý kezinde bir mezgilde tehnikalyq qyzmetkerlerdiń eńbekaqysyn kóterý qajet dep esepteidi.
«Sondyqtan biz áleýmettik salanyń kómekshi jáne tehnikalyq qyzmetkerlerine qatysty ádilettilik tanytýdy, jalaqyny kóterý kezinde olardy nazardan tys qaldyrmaýdy suraimyz. Joǵaryda aitylǵandarǵa bailanysty, «Aq jol» depýtattyq fraktsiiasy aitylǵan máselege nazar aýdarýdy qajet dep esepteidi jáne atalǵan sanattaǵy qyzmetkerlerdi laiyqty tabys deńgeiimen qamtamasyz etý múmkindigin qaraýyńyzdy suraidy», - dedi depýtat.
