Májilistiń jalpy otyrysynda depýtat Zúlfiia Súleimenova sý qaýipsizdigin qamtamasyz etýge qatysty Úkimet basshysy Asqar Maminniń atyna saýal joldady, dep habarlaidy "Ult aqparat".
«Sý qaýipsizdigin qamtamasyz etý – eldiń ulttyq qaýipsizdiginiń strategiialyq mindeti. Muny Memleket basshysy 26 qańtarda ótken Úkimettiń keńeitilgen otyrysynda atap ótti. Osy salada qabyldanyp jatqan sharalarǵa qaramastan, eldegi sý problemasy jyl saiyn kúrdelene túsýde. Ózenderdiń aǵysy qysqarýy jáne kólderdiń qurǵaýy, tushy sýdyń uzaq merzimdi qorlary – muzdyqtar men tońnyń erýi, jer asty basseinderdiń qarqyndy lastanýy baiqalady. Bul máseleler sý resýrstaryn basqarý jónindegi ulttyq jobamen qamtylýǵa tiis ekeni sózsiz», - dedi depýtat Májilistiń jalpy otyrysynda.
Osy oraida ol óziniń júieli sheshimin tappaǵan sektordyń negizgi problemalaryna toqtaldy. Birinshiden, sý resýrstaryn basqarýdyń memlekettik júiesiniń bytyrańqylyǵy men fragmentatsiialanýy saqtalýda. Búginde sý máselesimen 8 ministrlik, jergilikti atqarýshy organdar, sondai-aq «Samuryq-Qazyna» ulttyq ál-aýqat qorynyń kompaniialary ainalysady. Osylaisha, sý saiasatyn júzege asyrýǵa 172 qurylymdyq bólimshe men uiym tartylǵan. Bul rette ony úilestirý joq. Sýdy basqarýdyń qalyptasqan kúrdeli júiesi memlekettik apparatty problemalardyń sebepterin sheshýge emes, saldarlaryn joiýǵa nazar aýdarýǵa májbúr etedi. Mundai jaǵdai azyq-túlik qaýipsizdiginiń tómendeýine, janjaldarǵa jáne halyqtyń kóshi-qonyna ákelýi múmkin.
«Ekinshiden, búginde salada sý mamandarynyń tapshylyǵy baiqalýda. Mysaly, depýtattarmen transshekaralyq sý bólý máseleleri boiynsha shektes memlekettermen kelissóz pozitsiiamyzdy nyǵaitý týraly másele birneshe ret kóterilgen bolatyn. Alaida, másele sý diplomatiiasy salasyndaǵy kelissóz júrgizýshi mamandardyń tapshylyǵyna tirelip otyr. Bilim men tájiribe jinaqtalǵan birneshe ǵylymi institýttar materialdyq-tehnikalyq qamtamasyz etýdiń problemalaryn bastan keshirýde. Máselen, sý salasyndaǵy jabyq sipattaǵy jobalardy júzege asyratyn jáne Qytaimen sý jónindegi kelissózderdi saraptamalyq súiemeldeýdi qamtamasyz etetin jalǵyz Geografiia jáne sý qaýipsizdigi institýty birneshe jyldan beri óziniń jeke ǵimaraty máselesin sheshe almai keledi», - dedi Zúlfiia Súleimenova.
Onyń sózine qaraǵanda, joǵaryda baiandalǵannyń negizinde salanyń ózekti máselelerin daiyndalyp jatqan Sý resýrstaryn basqarý jónindegi ulttyq joba aiasynda sheshýdi qarastyrý mańyzdy.
«Birinshiden, sý saiasatyn shoǵyrlandyrý jáne sý resýrstaryn basqarý júiesin ońtailandyrý. Bul rette osy keshendi jáne mańyzdy máseleniń sheshimin bir ministrlikke nemese bir ákimdikke aýdarýǵa bolmaidy. Ekinshiden, ásirese sý diplomatiiasy salasynda sý mamandaryn daiarlaýdy jáne olardyń kelissóz protsesterine qatysýyn qamtamasyz etý. Úshinshiden, sý ǵylymi ortalyqtaryn tiisti materialdyq-tehnikalyq qamtamasyz etý máselesin sheshý. Sý qaýipsizdigi máselesi memlekettik saiasattyń basymdaqtaryna sóz júzinde emes, is júzinde ainalýy tiis», - dedi depýtat.
