Parlament Májilisi «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» Qazaqstan Respýblikasy Konstitýtsiialyq zań jobasyn talqylaidy, dep habarlaidy QazAqparat.
«Atalǵan Konstitýtsiialyq zań jobasy Memleket basshysynyń 2020 jylǵy qyrkúiektegi Joldaýyn, sondai-aq Parlamenttiń aǵymdaǵy sessiiasynyń ashylýynda berilgen tapsyrmasyn oryndaý maqsatynda ázirlendi. Zań jobasy aiasynda «Qazaqstan Respýblikasyndaǵy sailaý týraly» Konstitýtsiialyq Zańǵa jergilikti ákimderdi tikelei sailaýdy taǵaiyndaý, ol kandidattarǵa qoiylatyn talaptar, kandidattardy usyný tártibi, ózin-ózi usynǵan kandittardy qoldaý úshin qol jinaý tártibi, kandidattardy tirkeý, sailaý kezindegi daýystardy sanaý, sailaý qorytyndylaryn belgileý jáne jariialaý tártibi, sailaý ótkennen keiin sailanǵan ákimdi tirkeý boiynsha birqatar túzetýler kózdeledi», - dedi Májilistiń Zańnama jáne sot-quqyqtyq reforma komitetiniń tóraǵasy Qanat Mýsin palatanyń jalpy otyrysynda.
Onyń aitýynsha, zań jobasynda Parlament Májilisine sailaý kezindegi saiasi partiialardyń ótý shegin 7 paiyzdan 5 paiyzǵa deiin tómendetý, «bárine qarsymyn» degen jazýy bar baǵandy barlyq deńgeilerdegi sailaý biýlletenderine qosý týraly ózgerister men tolyqtyrýlar engiziledi.
«Zań jobasynda jergilikti ákimder sailaýyna saiasi partiialar kandidattardy usynýy kózdeledi. Budan basqa, tiisti aýdandyq mańyzy bar qalalar, aýyldar, kentter, aýyldyq okrýgter turǵyndarynyń passivti sailaý quqyqtaryn iske asyrý maqsatynda zań jobasynda ózin-ózi ákimder sailaýyna usynýǵa múmkindik qarastyrylǵan. Ákimdikke halyq usynatyn kandidat ózin qoldaýy úshin tiisti qol sanyn jinaidy. Komitet zań jobasyn qarap, qorytyndy ázirleýge daiyn», - dedi Q. Mýsin.
Sonymen qatar Májilis «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» ilispe zań jobasyn da qaraityn bolady.
Zań jobasymen «Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly», «Qazaqstan Respýblikasynyń memlekettik qyzmeti týraly» jáne «Saiasi partiialar týraly» zańdarǵa túzetýler kózdeledi.
«Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly» Zańda jergilikti ákimderiniń tártiptik teris qylyqtar jasaǵany úshin jaýaptylyǵyn qaraý bóliginde aýdandar (oblystyq mańyzy bar qalalar) máslihattarynyń quzyretin tolyqtyrý usynylady. Sondai-aq jergilikti ákim laýazymyna sailaýdyń jáne ókilettikterin toqtatýdyń jańa tártibi aiqyndaldy.
«Sonymen qatar, «Qazaqstan Respýblikasynyń memlekettik qyzmeti týraly» Zańǵa sailanatyn ákimder úshin attestattaý men rotatsiialaýdy alyp tastaý jáne arnaiy tekseristen ótkizýdiń jańa tártibin engizý bóliginde túzetýler engiziledi. «Saiasi partiialar týraly» Zańǵa jergilikti ákimdi sailaýǵa saiasi partiialardan kandidattardy usyný jóninde normalar qarastyrylǵan. Komitet zań jobasyn qarap, qorytyndy ázirleýge daiyn», - dedi Qanat Mýsin.
