Depýtattyń pikirinshe, Konstitýtsiiaǵa ózgerister men tolyqtyrýlar engizý boiynsha respýblikalyq referendým ótkizý óte oryndy usynys, óitkeni qoǵam ómiriniń mańyzdy salalaryna qatysty máselelerdi jalpyhalyqtyq daýys berý arqyly sheshý halyq biliginiń erekshe kórinisi.
"Zań jobasynda referendýmǵa shyǵarylǵan biýlletendegi birde-bir jaýap kórsetilmegen máselelerdi jaramsyz dep taný normalary engiziledi. Usynylǵan jaýaptardyń barlyq nusqalary kórsetilgen jaramdy biýlletenderdi taný. Alaida mundai biýlletender daýys berý kezinde eskerilmeidi. Budan basqa, daýys berýshiniń biýlletenge kez kelgen belgi qoiý arqyly daýys berý erki naqtylanady. Bul norma, óz kezeginde, daýys berý úderisin júzege asyrý barysynda azamattar úshin qolaily jaǵdai jasaidy", - dedi Bekjanov.
Májilismen atap ótkendei, zań jobasyn qabyldaý teris áleýmettik-ekonomikalyq jáne quqyqtyq saldarǵa alyp kelmeidi jáne biýdjet shyǵyndaryn talap etpeidi.
"Bul zań jobasy referendým týraly zańnyń mazmunyn ózgertpeidi, iaǵni túzetýler naqtylaýshy sipatqa ie. Muny durys túsiný kerek. Osy zań jobasyn maquldaý jáne ony Senatqa jiberý týraly usynys tústi. Daýys berýlerińizdi suraimyn. 98 depýtat qatysty. Sheshim qabyldandy", - dedi Májilis Spikeri Erlan Qoshanov.
Eske salaiyq, 29 sáýirde Prezident Qasym-Jomart Toqaev Qazaqstanda Konstitýtsiiaǵa ózgerister men tolyqtyrýlar engizý jóninde referendým ótkizýdi usyndy.
Respýblikalyq referendým - Qazaqstan Respýblikasy Konstitýtsiiasynyń, konstitýtsiialyq zańdarynyń, zańdarynyń jáne memleket tirshiliginiń ózge de neǵurlym mańyzdy máseleleri jónindegi sheshimderdiń jobalary boiynsha búkilhalyqtyq daýys berý.
Referendým búkil el boiynsha ótkiziledi. Qazaqstan tarihynda eki ret referendým ótken. Birinshisi 1995 jylǵy 29 sáýirde ótti jáne el Prezidentiniń ókilet merzimin uzartý máselesine qatysty boldy. 1995 jylǵy 30 tamyzda ótken ekinshi referendýmnyń máni Qazaqstannyń jańa konstitýtsiiasynyń jobasy bolǵan edi.
