Parlament Májilisiniń jalpy otyrysynda depýtat Faizolla Qamenov Úkimet basshysynyń orynbasary Roman Skliardiń atyna sý qaýipsizdigine qatysty saýal joldady, dep habarlaidy "Ult aqparat".
«Qazaqstannyń sý qaýipsizdigi memlekettik deńgeidegi úlken másele. Reseimen aradaǵy transshekaralyq ózenderden bólek, Qytai jáne Qyrǵyzstanmen aradaǵy sý máselesi taǵy bar. Bul tarapta da sý daýy aýyq-aýyq kóterilip turady. Resei Federatsiiasy Orynbor qalasyn sýmen qamtamasyz etýdi jaqsartý maqsatynda Jaiyq sý bógetin salýdy josparlap otyr. Bóget qurylysyna 300 million rýbl jumsaý kózdelgen. Eýropanyń uzyndyǵy jaǵynan úshinshi ózeni bolyp sanalatyn Jaiyqtyń sýy jyl ótken saiyn azaiyp barady. 2010 jyldan beri ózen 2,5 metrge tómendegen. Qazirdiń ózinde Jaiyqtyń boiynda 12 sý bógeti bar. Qazir jumys istep turǵan 12 bógettiń árqaisysynyń kólemi 10 mln sharshy metrdi quraidy. Bul aldaǵy ýaqytta ekologiialyq qiyndyqtarmen qosa, Qazaqstannyń sý qaýipsizdigine de úlken soqqy bolýy múmkin», - dedi depýtat.
Osy oraida ol biyl Reseiden sý satyp alýǵa qatysty málimdeme jasalǵanyn aitty. Onda Batys Qazaqstan oblysyna Reseiden 131 mln tekshe metr sý satyp alýǵa bailanysty 3,5 mlrd teńge qarjy bólý máselesi 2021 jylǵa arnalǵan biýdjettiń múmkindigine qarai qarastyrylatyny aitylǵan.
«2019 jyly Qyrǵyzstan Parlamenti Qyrǵyz Respýblikasynyń Sý Kodeksine ózgertýler men tolyqtyrýlar engizý máselesin talqylaǵan. Qyrǵyz eliniń sol kezdegi Aýyl sharýashylyǵy, tamaq ónerkásibi jáne melioratsiia ministriniń orynbasary Janybek Kerimáliev «Sý týraly zańǵa ózgertýler engizilse, Qyrǵyzstan kórshi elderden sý úshin qarjy talap ete alady» dep málimdegen. Buǵan deiin dál osy máseleni 2000 jyldary Qyrǵyz Parlamentiniń depýtattary kótergen bolatyn. 2019 jylǵy statistika boiynsha, Qazaqstan Qyrǵyzstanǵa sý alǵany úshin jylyna 119 million teńge tólep kelgen. Biraq bul qarjy sýǵa emes, Qyrǵyzstan aýmaǵyndaǵy sý qoimalaryn jóndeýden ótkizýge berilgen. Qytaimen aradaǵy sý máselesi Resei jáne Qyrǵyzstanmen salystyrǵanda áldeqaida kúrdeli», - dedi Faizolla Qamenov.
«Qazaqstannyń sý qaýipsizdigi máselesi qalai sheshilýde? Qazaqstan úshin sý qaýipsizdigi, sýdyń tapshylyǵy aldaǵy 10-20 jylda aldyńǵy qatarǵa shyǵatyny anyq. Ony sheshý úshin qandai da bir áreketter jasalyp jatyr ma, joq álde bolashaqtyń enshisine qaldyrdy ma, ol jaǵy belgisiz. Joǵaryda baiandalǵannyń negizinde, Sizden osy depýtattyq saýaldy qarap, Úkimettiń osy problemalarǵa qatysty ustanymyn kórsetseńiz», - dedi depýtat Premer-Ministrdiń orynbasary Skliardiń atyna joldaǵan saýalynda.
