Parlament Májilisiniń jalpy otyrysynda «Aq jol» fraktsiiasynyń depýtattyq saýaly Ulttyq birińǵai testileýdi uiymdastyrýǵa qatysty boldy. Osy oraida saýal Premer-Ministrdiń orynbasary Eraly Toǵjanovtyń atyna joldandy, dep habarlaidy "Ult aqparat".
«Biyl mektep túlekteri Ulttyq biryńǵai testini jańa formatta tapsyrýda. Beinekameralardy ornatý jáne «proktoring» júiesiniń arqasynda Bilim ministrligi testileý protsesti ashyq túrde ótkizip jatyr. Sonymen qatar, biyl túlekter qajet bolǵan jaǵdaida testini qaita tapsyrýǵa múmkindik aldy. Munyń bári jaqsy jáne durys sharalar, biraq ata-analar UBT-ny qaita tapsyrý merziminiń belgisizdigine bailanysty depýtattarǵa júgindi. Bul merzim normativti túrde anyqtalmaǵan, biraq aýyzsha tamyz aiynyń sońy dep ataldy.
Ótken oqý jylyn qashyqtan oqytý jáne osyǵan bailanysty strestik jaǵdai, túlekter kórsetkishteriniń nasharlaýyna yqpal etkenin atap ótken jón», - dedi depýtat Serik Erýbaev.
Onyń aitýynsha, balalardyń kópshiligi mektepte jaqsy kórsetkishterge ie boldy jáne testileýdiń nashar nátijelerin óte aýyr qabyldady. Otbasylardyń kópshiligi memlekettik organdardy qashyqtan oqytýdyń tómen sapasyn kináláp, narazalyq bildirip jatyr.
«Mundai shaǵymdar úshin obektivti negiz bar ekenin moiyndaý kerek. Sonymen qatar, kóptegen ata-ana balalarynyń osy alǵashqy úlken sátsizdikke reaktsiiasy týraly alańdaýshylyq bildirip otyr. Ótken jyldardyń statistikasyn bárimiz bilemiz, qansha túlek streske tótep bere almady. Osy oraida jastarymyzdy tabandylyqpen jigerlendirgen durys bolar edi. Sondyqtan bizdiń túlekterimizdiń aldyńda esik jabýdyń qajeti joq. Olardyń arasynda bolashaq jetekshiler, talanttar ári laiyqty azamattar shyǵýy múmkin. Kóptegen sheteldik joǵary oqý oryndary bizdiń túlekterimizdi UBT-syz, óz erejeleri boiynsha qabyldaitynyn da eskerý qajet», - dedi depýtat.
«Qaita tapsyrýdyń alshaqtaýynyń áseri, keibir talapkerlerdiń Qytai, Latviia, Chehiia, Vengriia, Ýkraina jáne taǵy basqa elderdiń ýniversitetterine túsýge májbúrleidi. Reseidiń keibir joǵary oqý oryndary jyldyń basynan bastap bastap eń jaqsy oqýshylardy shaqyra bastady, sol sebepti myńdaǵan daryndy balalar Qazaqstannan UBT-ǵa deiin ketedi. Osylaisha, biz UBT-ny qaita tapsyrýdyń keshiktirilýi eshteńege negizdelmegen jáne aiqyn táýekelderge alyp keledi dep esepteimiz. Osyǵan bailanysty, qurmetti Eraly Luqpanuly, sizden shuǵyl túrde Bilim ministrligine qaita testileýdi qysqa ýaqyt ishinde uiymdastyrýdy jáne osy máseleni jeke baqylaýǵa alýdy tapsyrýyńyzdy suraimyz», - dedi Serik Erýbaev.
