Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine kórneki aqparat máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Atalǵan zań jobasyn qabyldaýdyń maqsaty - Qazaqstan Respýblikasynyń keibir zańnamalyq aktilerin kórneki aqparat máseleleri boiynsha jetildirý.
Zań jobasynyń negizgi baǵyttary:
1. Derektemeler men kórneki aqparat mátinderin orfografiia normalaryna sáikes jazý;
2. Derektemeler men kórneki aqparat mátinderiniń teńtúpnusqaly aýdarmasyn (aýtentichnost) saqtap otyryp jazý;
3. «Mátinniń teńtúpnusqaly aýdarmasy» degen uǵym engizý.
«Kórneki aqparat quraldary (bannerler, mańdaishalar, habarlandyrýlar, jarnama, baǵa kórsetkishteri jáne t.b.) eldegi qoǵamdyq-saiasi, áleýmettik-ekonomikalyq jaǵdaiǵa áser etetin mańyzdy quraldar bolyp sanalady. Derektemeler men kórneki aqparat mátinderin orfografiia normalaryna sáikes jazý talaby qazaq tilindegi mátinderdiń sapasyz jazylýyna, orfografiialyq qatelerge jol bermeýge baǵyttalǵan. Derektemeler men kórneki aqparat mátinderiniń teńtúpnusqaly aýdarmasyn saqtap otyryp jazý talaby qoǵamda eki tilde (qazaq jáne orys tilderindegi) berilgen mátinderdiń maǵynalyq, mazmundyq jaǵynan sáikes kelmeýi faktilerin joiýǵa baǵyttalyp otyr», - dedi QR Mədeniet jəne sport ministri Aqtoty Raiymqulova.
Onyń aitýynsha, kórneki aqparatty ashyq keńistikte jáne ǵimarattar ishinde zańnamada belgilengen tártippen memlekettik organdarmen qatar kez kelgen kásipkerlik sýbektileri júzege asyra alady. Kásipkerlik sýbektileri kórneki aqparatty óz ónimi men qyzmetin ilgeriletý quraly retinde paidalanady.
«Memlekettik organdarǵa azamattardan kórneki aqparatty ornalastyrý kezinde til týraly zańnama talaptarynyń buzylýyna bailanysty shaǵymdardyń kóptep túsýi oryn alýda. Osy oraida memlekettik tildegi kórneki aqparattyń bolmaýyn azamattar Qazaqstan Respýblikasy Konstitýtsiiasynyń 14-babynda bekitilgen óz quqyqtaryna qysym jasaý dep sanaidy.
Kórneki aqparatqa qatysty zań buzýshylyqtar boiynsha memlekettik organdarǵa 2018 jyly – 12 886 ótinish, 2019 jyly 12 900 ótinish kelip túsken. 2020 jyly kórneki aqparattar boiynsha jedel jelige (call center) kelip túsken shaǵymdar sany – 3442-ni quraǵan», - dedi ministr.
Atalǵan problemalardy sheshý maqsatynda zań jobasy aiasynda Qazaqstan Respýblikasynyń 13 zańnamalyq aktisine túzetýler engizý kózdelip otyr.
Kútiletin nátije:
- memlekettik tildiń kórneki aqparatta mindetti túrde qoldanylýyn qamtamasyz etý;
- derektemeler men kórneki aqparat mátinderin orfografiia normalaryna sáikes jazýdy qamtamasyz etý;
- mátinderdiń eki tilde teńtúpnusqalylyǵyn saqtap jazýdy qamtamasyz etý.
«Zań jobasyn qabyldaý elimizdegi til saiasatyn tiimdi iske asyrýǵa yqpal etetin bolady, teris quqyqtyq jáne áleýmettik-ekonomikalyq saldarǵa ákep soqtyrmaidy», - dedi A. Raiymqulova.
