Parlament Májilisinde Qazaqstan Respýblikasynyń keibir zańnamalyq aktilerine aýditorlyq qyzmet máseleleri boiynsha ózgerister men tolyqtyrýlar engizý týraly» zań jobasy tanystyryldy, dep habarlaidy "Ult aqparat".
«Zań jobasy aýditorlyq qyzmetti, memlekettik aýdit pen qarjylyq baqylaýdy jáne býhgalterlik esepti jetildirý maqsatynda bir top Qazaqstan Respýblikasy Parlament depýtattarynyń bastamasymen ázirlendi. Osy zań jobasynyń tujyrymdamasy 2019 jylǵy 15 qarashada zań jobalaý qyzmeti máseleleri jónindegi vedomstvoaralyq komissiianyń 498-shi otyrysynda ashyq daýys berýmen maquldandy», - dedi depýtat Omarhan Óksikbaev.
Zań jobasy aiasynda depýtattar qoldanystaǵy 5 zańǵa 47 túzetýge bastamashylyq jasady.
Atap aitqanda, zań jobasy aiasynda aýditorlyq qyzmetti retteý jónindegi táýelsiz organdy qurý, iaǵni Kásibi keńestiń jumysyn uiymdastyrý eskerilgen.
Depýtattyń paiymynsha, aýdit sapasyn baqylaýdyń róli artyp keledi.
«Kásibi keńes onyń quryltaishysy bolatyn mamandandyrylǵan uiymdarmen qurylady. Atalǵan keńestiń múlki kásibi uiymdardan birjolǵy túsimderder esebinen qalyptastyrylady. Olar Kásibi keńestiń múlkine múliktik quqyqty talap etpeidi. Sonymen birge, múshelik jarna institýty iske qosylǵan jaǵdaida aýditorlyq qyzmet boiynsha Kásibi keńestiń táýelsizdigi qaǵidasy buzylady», - dedi O. Óksikbaev.
Kásibi keńes Basqarmasynyń quramyna Qarjy ministrliginiń, AHQO, KASE, aýditorlyq uiymdar ókilderi kirgen, bul óz kezeginde basqarýdyń korporativtik ádisterin engizýge múmkindik beredi.
