Parlament Májilisiniń jalpy otyrysynda «Mindetti áleýmettik saqtandyrý týraly» zań jobasy ekinshi oqylymda maquldandy, dep habarlaidy "Ult aqparat".
Atalǵan zań jobasy 2019 jylǵy 12 maýsymda Májilistiń jalpy otyrysynda birinshi oqylymda maquldanǵan bolatyn.
«Zań jobasy saqtandyrýdyń qaǵidattarynyń, áleýmettik ádildiktiń saqtalýy eskerile otyryp, mindetti áleýmettik saqtandyrý júiesin damytýǵa, eńbek ótili men tólem mólsherleri arasyndaǵy ózara bailanysty kúsheitýge, halyqty mindetti áleýmettik saqtandyrý júiesine qatystyrý úshin yntalandyrýdy qalyptastyrýǵa baǵyttalǵan», - dedi depýtat Aigúl Nurkina.
Zań jobasynda eńbekke qabilettilikten aiyrylý koeffitsientin aiqyndaýdyń jańa tetigi kózdeledi. Ol árbir jaǵdaiǵa jeke tásilmen qaraýǵa negizdeledi. Qoldanystaǵy zańnamada ortashalanǵan koeffitsientterdi qoldaný kózdelgen. Osy oraida eńbekke qabilettilikten aiyrylý koeffitsientin meditsinalyq-áleýmettik saraptama bólimsheleri anyqtaǵan odan aiyrylýdyń jeke dárejesine sáikes belgileý usynylady. Sonyń nátijesinde eńbekke qabilettilikten aiyrylý boiynsha áleýmettik tólemderdiń mólsherin ulǵaitý kútilip otyr.
Budan bólek, qatysý ótiline 5 jyl tolǵannan keiin mindetti áleýmettik saqtandyrý júiesine qatysý ótiliniń qol jetkizilgen koeffitsentin jyl saiyn 2 paiyzǵa arttyrý kózdeledi. Bul norma mindetti áleýmettik saqtandyrý júiesine qatysý ótili men áleýmettik tólemderdiń mólsherleri arasyndaǵy ózara bailanysty kúsheitedi.
Munymen qosa, jumysynan aiyrylýy boiynsha áleýmettik tólemderdi esepteýdiń jetildirilgen tetigi eskerilgen. Atap aitqanda, zań jobasynda qatysý ótili 5 jáne odan kóp jyl bolǵan adamdar úshin jumysynan aiyrylý sebebine qaramastan, 6 aiǵa deiingi merzimge jumysynan aiyrylýy boiynsha áleýmettik tólemder taǵaiyndaý kózdeledi.
