Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasy birinshi oqylymda maquldandy, dep habarlaidy "Ult aqparat".
«Elimizdiń egemendigin nyǵaitý jáne halyqtyń azyq-túlik qaýipsizdigin qamtamasyz etý maqsatynda, Qazaqstan azamattarynyń pikirin eskere otyryp, 2016 jyldyń 6 mamyrynda Qazaqstan Respýblikasynyń Prezidenti Jarlyǵymen aýyl sharýashylyǵy jerlerin sheteldikterge, azamattyǵy joq adamdarǵa, sheteldik kompaniialarǵa sondai-aq, sheteldik úlesi bar qazaqstandyq kompaniialarǵa jalǵa berýge, budan basqa Qazaqstannyń azamattary men zańdy tulǵalaryna aýyl sharýashylyǵy jerlerine jeke menshikke berýge qatysty moratorii engizildi. Moratorii merzimi 2021 jyldyń 31 jeltoqsanynda aiaqtalatynyn eskere otyryp, Qazaqstan Respýblikasynyń Prezidenti Qasym-Jomart Kemeluly Toqaev aǵymdaǵy jyly 25-shi aqpandaǵy Ulttyq qoǵamdyq senim keńesiniń besinshi otyrysynda jer máselesi qashanda halqymyz úshin asa mańyzdy ekendigin jariialai otyryp, sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde birjola tyiym salýdy tapsyrdy», - dedi Aýyl sharýashylyǵy ministri Saparhan Omarov.
Osyǵan orai, tiisti zań jobasy ázirlenip aǵymdaǵy jyly 15 naýryzda Májiliske engizildi.
«Búgingi tańda usynylǵan zań jobasymen aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysýy bar ǵylymi ortalyqtarǵa, sondai-aq qandastarǵa berýge tolyq tyiym salý kózdelgen. Sonymen qatar, zań jobasynda budan buryn sheteldiktermen jáne sheteldik úlesi bar qazaqstandyq kompaniialarmen jalǵa alynǵan aýyl sharýashylyǵy jerleriniń paidalaný merzimin uzartylmaityndyǵy jáne olardyń paidalaný merzimi aiaqtalǵanǵa deiin ǵana ielikte bolatyny qarastyrylǵan», - dedi ministr.
Onyń aitýynsha, qandastar boiynsha olar jeke qosalqy sharýshylyǵy, baý-baqsha jáne saiajai qurylysy úshin jer ýchaskesin ala alady, aýyl sharýashylyǵy jerlerin Qazaqstan azamattyǵyn alǵannan keiin ǵana jalǵa alýǵa múmkindigi bar.
Zań jobasymen Jer kodeksi jáne úsh zańǵa, onyń ishinde, Kóshi-qon zańyna ózgerister engizilip otyr.
Eske sala keteiik, biyl naýryz aiynda Prezident Qasym-Jomart Toqaev jerdi sheteldikterge satýǵa birjola tyiym salýdy kózdeitin zań jobasyn Májiliske joldaǵanyn aitqan edi.
«Búgin men ózimniń Prezident retinde zań shyǵarýǵa bastamashylyq etý quqyǵymdy paidalanyp, jerdi sheteldikterge satýǵa jáne jalǵa berýge birjola tyiym salýdy kózdeitin zań jobasyn Májiliske joldadym. Parlament ony belgilengen reglamentke sáikes qarastyryp, tiisti sheshim qabyldaidy», - dep jazdy Memleket basshysy Twitter-de.
