Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine jer qatynastaryn damytý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy "Ult aqparat".
Zań jobasy Memleket basshysynyń tapsyrmasyn oryndaý maqsatynda jáne jer qatynastary salasyndaǵy negizgi problemalyq máselelerdi talqylaý ári olar boiynsha usynymdar ázirleý úshin arnaiy qurylǵan Jer reformasy jónindegi komissiia qyzmetiniń qorytyndysy boiynsha ázirlendi.
«Atap aitqanda, otandyq jer paidalanýshylar úshin jalǵa berý institýtyn saqtaý týraly jáne qazaqstandyqtarǵa aýyl sharýashylyǵy jerlerin jekemenshikke berý jónindegi Jer kodeksi normalarynyń qoldanysyna moratoriidi uzartý týraly tujyrymdamalyq sheshim qabyldandy. Budan basqa, zań jobasynda jerdi paidalaný men qorǵaýdy memlekettik baqylaý kúsheitiledi, aýyl sharýashylyǵy maqsatyndaǵy jerlerge satyp alynbaǵan jer paidalaný quqyǵyn ielikten shyǵarý múmkindigi kózdeledi, jergilikti halyqtyń muqtajy úshin jaiylymdyq jerlerdiń aýmaǵy aiqyndalady, sondai-aq jer zańnamasyn odan ári jetildirýge baǵyttalǵan basqa da normalar engiziledi», - dedi depýtat Berik Ospanov zań jobasyn talqylaý kezinde.
Zań jobasyn Palata biylǵy 2 maýsymda birinshi oqylymda maquldady.
Depýtattar engizgen túzetýlerdiń basym bóligi jobanyń negizgi maqsattarymen bailanysty, redaktsiialyq-naqtylaý sipatqa ie jáne zań tehnikasy qaǵidalaryna, Qazaqstan Respýblikasynyń qoldanystaǵy zańnamasyna sáikes keltirýge baǵyttalǵan.
Osylaisha, birqatar ózgerister aýyl sharýashylyǵy maqsatyndaǵy jerlerde jer paidalaný quqyǵyn ielikten shyǵarýǵa qatysty: tiisti ýákiletti organdarǵa jalǵa berý sharttaryn qaita resimdeý jónindegi quzyret beriledi; jaldaý quqyǵy shart talaptarynyń ózgeristeri onyń tarabyn (jańa jer paidalanýshyny) naqtylaý bóliginde tirkelgen kezden bastap týyndaityny aiqyndaldy; jer paidalaný shartynyń ataýy naqtylandy.
«Budan basqa, jer ýchaskesiniń nysanaly maqsatyna qarai (qurylys salý úshin jáne aýyl sharýashylyǵy óndirisi úshin berilgen) jer ýchaskesin maqsaty boiynsha paidalanbaý kezeńderiniń arajigi ajyratyldy. Jer komissiiasynyń hattamalyq sheshimine shaǵym jasaý rásimin naqtylaý maqsatynda osy sheshimge 2021 jylǵy 1 shildeden bastap kúshine enetin Qazaqstan Respýblikasynyń Ákimshilik rásimdik-protsestik kodeksinde kózdelgen tártippen sotqa shaǵym jasalýy múmkin dep aiqyndalǵan. Zań jobasymen engiziletin túzetýlermen úilestirý úshin Sý kodeksine jáne «Ruqsattar jáne habarlamalar týraly» Zańǵa ózgerister de kózdelip otyr. Májilistiń barlyq komiteti osy zań jobasy boiynsha oń qorytyndylaryn berdi. Múddeli ýákiletti organdar, saiasi partiialar, saraptamalyq qoǵamdastyq ókilderiniń qatysýymen jumys tobynyń 7 otyrysy jáne Bas komitettiń 2 keńeitilgen otyrysy ótkizildi», - dedi Berik Ospanov.
