Foto:depositphotos.com
Qazaqstanda veipterdi ákelýge jáne taratýǵa tyiym salyndy. Parlament Májilisi «Qazaqstan Respýblikasynyń keibir zańnamalyq aktilerine densaýlyq saqtaý máseleleri boiynsha ózgerister men tolyqtyrýlar engizý týraly» zańdy ekinshi oqylymda qabyldady, dep habarlaidy "Ult aqparat" Sputnik Qazaqstan saityna silteme jasap.
Zań jobasynda temeki ónimderin tutynýdy shekteý normalary qarastyrylǵan. Oǵan sáikes endi elektron tutyný júielerin (veip - eskertý) ákelýge, óndirýge, satýǵa jáne taratýǵa tyiym salynady.
Májilis depýtaty Elnur Beisenbaevtyń aitýynsha, veipke tyiym salý máselesi úsh jyl boiy qyzý talqylanyp keledi.
"Qazirgi kezge deiin beiresmi aqparatqa súiensek veipterdiń taralýy 200 ese ósken. Olar qazir qaptap tur, baraholkadan nemese kez kelgen dúkennen balalar satyp ala beredi. Sondai-aq jýyrda "Balalar qory" atty qoǵamdyq uiymnyń kishigirim áleýmettik zertteýi boiynsha almatylyq balalardyń 80%-i, astanalyq balalardyń 83%-i veip qoldanady degen aqparat shyqty. Bul - óte qaýipti úrdis. Biz oǵan toqtaý salýymyz kerek. Sol sebepti bizdiń qazirgi baǵytymyz – balalardy osyndai qaýip-qaterden, densaýlyǵyna ziian keltiretin indetten saqtaý. Pozitsiia osy", - dep túsindirdi depýtat Májilis kýlýarynda.
Jańa normaǵa sáikes, veipterdiń zańsyz ainalymy úshin qylmystyq jaýapkershilik engiziledi.
Dálirek aitqanda, veipti satqany úshin eń joǵary jaza – 50 táýlikke deiin qamaýǵa alý; ákelip, taratqany úshin – 2 jylǵa deiin bas bostandyǵynan aiyrý, qylmystyq top jasaǵan ne asa iri mólsherde jasalǵan, birneshe ret jasalǵan áreket úshin – 5 jylǵa deiin bas bostandyǵynan aiyrý jazasy kózdelgen.
Sonymen qatar osy zań aiasynda meditsinalyq qyzmetkerlerge emdelýshiniń jeke erekshelikterine qarai emdeýdiń ońtaily ádisterin tańdaý múmkindigin berý úshin meditsinalyq kómek kórsetý kezindegi mindetti klinikalyq hattamalardy qoldaný alynyp tastalady.
